“Bizda hozirgi siyosatni inkor etadigan g‘oyalar bo‘ladi” – Alisher Qodirov prezident saylovlari to‘g‘risida
Qonunchilik palatasi spikerining o‘rinbosari, “Milliy tiklanish” partiyasi yetakchisi Alisher Qodirov Alter Ego loyihasiga bergan intervyusida 24-oktabr kuni bo‘lib o‘tadigan O‘zbekiston Respublikasi Prezidenti sayloviga tayyorgarlik haqida so‘zladi.
Unga ko‘ra, “Milliy tiklanish” partiyasi 2019-yil oxiridagi parlament saylovlaridan so‘ng darhol prezident saylovlariga tayyorgarlikni boshlagan. Fraksiyaning maxsus ishchi guruhi saylovoldi dasturi ustida ishlamoqda. Siyosatchi ushbu dasturga Prezident Shavkat Mirziyoyevning “amaldagi siyosatini inkor etuvchi g‘oyalar” kiritilishini ta’kidladi.
“Bizda nafaqat o‘ziga xos g‘oyalar bor. Albatta, men hozir hamma narsani aytolmayman, chunki ishchi guruh hali bizga to‘liq ma’lumotlarni taqdim etmagan. Qisqasi, biz amaldagi siyosatning ayrim qismlarini inkor etadigan, butunlay boshqacha g‘oyalarga ega bo‘lamiz. Bizda muqobil g‘oya bo‘ladi. Biz hamma narsa bilan murosa qilamiz”, – dedi partiya rahbari.
Alisher Qodirov odamlarning ko‘p shikoyat qilishiga qarshi ekanligini ham aytib o‘tdi. Uning so‘zlariga ko‘ra, Prezident xalq qabulxonalariga murojaatlarning aksariyati “xalqning noqonuniy talablaridan” iborat.
“Deputatlarga ham bunday murojaatlar kelib tushmoqda. Uyimda muzlatkich yo‘q, lekin men o‘z ovozimni palonchi deputatga bergandim, degan murojaatlar keladi. ... Va mablag‘i ko‘p partiyalar borib, muzlatkich sotib olib beryapti ham. Shu o‘rinda savol tug‘iladi: Xalq qabulxonalari xalqimiz taraqqiyotiga xizmat qilyaptimi yoki to‘sqinlik?”, – deydi deputat.
“Milliy tiklanish” yetakchisi muammolarni shu tarzda hal qilish odamlarni bir xil dunyoqarashga ega bo‘lib qolishiga olib keladi deb hisoblaydi.
“Bizning partiyamiz xalq qabulxonalarini sud tizimi bilan birlashtirish g‘oyasini ilgari suradi. Unda har bir murojaat sudga murojaat sifatida ko‘rib chiqiladi va unga huquqiy baho beriladi. Shaxs sudga murojaat qilib, o‘z huquqini talab qiladi”, – deydi Qodirov.
Alisher Qodirovning fikricha, vakolatli organ murojaatning “to‘g‘riligini” aniqlashtiradi, so‘ng sudga ko‘rib chiqish uchun topshiradi yoki sababini tushuntirib rad etadi.
Deputatning qayd etishicha, “Milliy tiklanish” partiyasi prezidentlikka nomzodini iyun oyida e’lon qilishni rejalashtirmoqda. Saylov kodeksiga muvofiq, siyosiy partiya prezidentlikka nomzodni saylov kampaniyasi boshlangani to‘g‘risida e’lon qilingan kundan to‘rt oydan kechiktirmay taqdim etishi kerak (agar partiya Adliya vazirligida ro‘yxatdan o‘tgan bo‘lsa). Saylov kampaniyasining o‘zi Markaziy saylov komissiyasi tomonidan ommaviy axborot vositalarida amaldagi prezidentlik muddati tugashidan uch oydan kechiktirmay e’lon qilinadi.
“Bizning maqsadimiz saylovchilarimizni ba’zi syurprizlar bilan ajablantirish emas. Biz, albatta, ushbu saylovlardan natija kutmoqdamiz, nimagadir erishmoqchimiz. Nomzodga kelsak, biz buni ko‘rib chiqyapmiz. Siz mendan yaxshiroq bilasiz, bu oson bo‘lmaydi. Hammasi oddiy emas. Ammo bizning nomzodlarimiz jamiyatimizda nimani o‘zgartirish kerak bo‘lsa, shuni ilgari suradi. Ushbu g‘oyalar endi bizning maxsus guruhimiz tomonidan yopiq eshiklar ortida ishlab chiqilmoqda”, – dedi u.
Deputat partiyada nomzodlarning “aniq ro‘yxati” mavjudligiga e’tibor qaratdi. Unga ko‘ra, “Milliy tiklanish” ishchi guruhi tomonidan ishlab chiqilgan takliflarni himoya qila oladigan partiyadan yagona nomzodni aniqlash uchun boshlang‘ich (partiyaviy saylovlar) o‘tkazish rejalashtirilgan.
“Raqobatchilar oddiy bo‘lmaydi. Bunga aminman ... Biz boshqalar bilan raqobatlashishga tayyormiz. Biz o‘zimiz biron narsaga erishishni xohlaymiz. Saylovda odamlarga, agar bizning nomzodimiz g‘olib chiqsa, nimalar sodir bo‘lishini tushuntiramiz. Bizda vaziyatni o‘zgartiradigan aniq takliflar bor”, – dedi u.
Alisher Qodirov amaldagi Prezident Shavkat Mirziyoyevning xizmatlarini ham ta’kidlab o‘tdi, ammo “shunchaki minnatdorlik tufayli u bilan raqobatlashmaslik”ni noto‘g‘ri deb hisoblaydi.
“Ushbu o‘zgarishlar uning siyosiy irodasi bilan bog‘liq. Men Prezident bilan bir necha uchrashuvlarda bo‘lganman. U chin dildan raqobatlash, ol, qil, deydi. Bu odam haqiqatan ham O‘zbekistonni o‘zgartirishni xohlaydi”, – dedi deputat.
Eslatib o‘tamiz, Oliy Majlis Qonunchilik palatasi deputatlari 29-yanvar kuni bo‘lib o‘tgan yig‘ilishda saylov qonunchiligi takomillashtirilishi munosabati bilan ayrim qonun hujjatlariga o‘zgartirish va qo‘shimchalar kiritish to‘g‘risida qonunni qabul qilgandi.
Qonundagi bandlardan biri bilan Prezident, Qonunchilik palatasi, Qoraqalpog‘iston Jo‘rqorg‘i Kengesi, shuningdek, viloyatlar, tumanlar va shaharlar davlat hokimiyati vakillik organlari uchun o‘tkaziladigan saylovlar sanasi dekabr oyining uchinchi o‘n kunligining birinchi yakshanbasidan oktabr oyining uchinchi o‘n kunligining birinchi yakshanbasiga ko‘chirildi (2021-yilda ushbu sana 24-oktabrga to‘g‘ri kelmoqda).
Prezident Shavkat Mirziyoyev 29-dekabr kuni Oliy Majlisga yo‘llagan murojaatnomasida 2021-yilda o‘tkaziladigan “davlat va xalq hayotidagi muhim siyosiy hodisa” — prezidentlik saylovlari masalasiga to‘xtalib o‘tgandi. O‘shanda Shavkat Mirziyoyev Markaziy saylov komissiyasi “bo‘lajak saylovlarning milliy qonunchilik va umume’tirof etilgan xalqaro demokratik tamoyillar asosida yuksak saviyada tashkil etilishiga alohida e’tibor qaratishi” lozimligini ta’kidlagandi.
Bundan avval O‘zbekistonda saylovchilarning Yagona elektron ro‘yxatini shakllantirish tartibiga o‘zgartirishlar kiritilgani hamda O‘zbekistondagi saylov byulletenida nomzodning egallab turgan lavozimi va ish joyi ko‘rsatilmasligi mumkinligi haqida xabar berilgandi.
