Oliy Majlis Qonunchilik palatasi 4-may kuni Saylov kodeksiga o‘zgartish va qo‘shimchalar kiritishga oid qonun loyihasini birinchi o‘qishda qabul qilib, ko‘rib chiqish uchun Senatga yubordi.

Foto: “Daryo”

Quyi palata deputati, O‘zLiDeP a’zosi Rasul Kusherbayevning yozishicha quyidagi o‘zgartish va qo‘shimchalar kiritilishi kutilmoqda:

  • 4, 20, 22, 101 va 102-moddalarda yuqori turuvchi saylov komissiyalarining vakolatlaridan quyi turuvchi saylov komissiyalarining harakatlari va qarorlari ustidan berilgan shikoyatlarni ko‘rib chiqishni chiqarib tashlash;
  • 21-moddada O‘zbekiston Prezidenti saylovini o‘tkazish bo‘yicha okrug saylov komissiyasi komissiya raisi, rais o‘rinbosari, kotibi va 11—18 nafar (amaldagi kodeksda 6—8 nafar) komissiya a’zosidan iborat tarkibda tuzilishini belgilash;
  • 31-moddadan saylov byulletenida nomzodning egallab turgan lavozimi (mashg‘ulotining turi), ish joyi ko‘rsatilishi haqidagi normani chiqarib tashlash;
  • 38-moddada saylovlarda siyosiy partiya yoki nomzodlarni qo‘llab-quvvatlab imzo qo‘yishda fuqarolar pasport bilan bir qatorda identifikatsiya kartasi orqali ham shaxsini tasdiqlashi mumkinligini belgilash;
  • 48-moddada saylovchilar bilan uchrashuvlar kabi ommaviy tadbirlar ularning o‘tkazilish joyi va vaqti haqida tuman (shahar) hokimliklari kamida uch kun oldin yozma ravishda xabardor qilingan holda o‘tkazilishi, bunda, ushbu ommaviy tadbirlarni o‘tkazish uchun ruxsatnoma talab etilmasligini belgilash.

Rasul Kusherbayevning yozishicha, qonun loyihasi YeXHT Demokratik institutlar va inson huquqlari bo‘yicha byurosi (DIIHB) saylovlar bo‘yicha missiyasining O‘zbekistonda saylov tizimini takomillashtirishga qaratilgan tavsiyalari bo‘yicha saylov to‘g‘risidagi amaldagi qonunchilikning tahlillari asosida Qonunchilik palatasining bir guruh deputatlari tomonidan ishlab chiqilgan. DIIHBning prezident saylovlariga oid ilk missiyasi yaqin haftalarda kelishi kutilmoqda.

Deputatlarning qayd etishicha, qonun loyihasi qabul qilinishi milliy saylov qonunchiligini umume’tirof etilgan xalqaro saylov standartlari asosida yanada takomillashtirishga va mazkur yo‘nalishda amalga oshirilayotgan demokratik islohotlarni xalqaro hamjamiyatga yetkazishga xizmat qiladi.

Eslatib o‘tamiz, Oliy Majlis Qonunchilik palatasi deputatlari 29-yanvar kuni bo‘lib o‘tgan yig‘ilishda saylov qonunchiligi takomillashtirilishi munosabati bilan ayrim qonun hujjatlariga o‘zgartish va qo‘shimchalar kiritish to‘g‘risida qonunni qabul qilgandi.

Qonundagi bandlardan biri bilan Prezident, Qonunchilik palatasi, Qoraqalpog‘iston Jo‘rqorg‘i Kengesi, shuningdek, viloyatlar, tumanlar va shaharlar davlat hokimiyati vakillik organlari uchun o‘tkaziladigan saylovlar sanasi dekabr oyining uchinchi o‘n kunligining birinchi yakshanbasidan oktabr oyining uchinchi o‘n kunligining birinchi yakshanbasiga ko‘chirildi (2021-yilda ushbu sana 24-oktabrga to‘g‘ri kelmoqda).

Prezident Shavkat Mirziyoyev 29-dekabr kuni Oliy Majlisga yo‘llagan Murojaatnomasida 2021-yilda o‘tkaziladigan “davlat va xalq hayotidagi muhim siyosiy hodisa” — prezidentlik saylovlari masalasiga to‘xtalib o‘tgandi. O‘shanda Shavkat Mirziyoyev Markaziy saylov komissiyasi “bo‘lajak saylovlarning milliy qonunchilik va umume’tirof etilgan xalqaro demokratik tamoyillar asosida yuksak saviyada tashkil etilishiga alohida e’tibor qaratishi” lozimligini ta’kidlagandi.