O‘zbekistonlik uch nafar sportchi Tokio Olimpiadasiga yo‘llanma oldi. Umumiy yo‘llanmalar soni 50 taga yetdi

Iordaniyaning Amman shahrida taekvondo bo‘yicha Tokio—2020 Olimpiya o‘yinlariga yo‘llanma beruvchi litsenzion musobaqa bo‘lib o‘tmoqda.

Mazkur musobaqada o‘zbekistonlik sportchi Svetlana Osipova +67 kg vazn toifasida Olimpiada litsenziyasini qo‘lga kiritdi. Osipova musobaqaning yarim final bosqichida filippinlik Kirsti Alorani mag‘lub etib, to‘rt yillikning eng nufuzli birinchiligida ishtirok etish huquqiga ega bo‘ldi.

Shu tariqa taekvondo bo‘yicha O‘zbekiston terma jamoasi Tokio—2020 Olimpiya o‘yinlariga to‘rtinchi yo‘llanmani qo‘lga kiritdi:

• -68 kg: Ulug‘bek Rashidov
• -80 kg: Nikita Rafalovich
• -67 kg: Nigora Tursunqulova
• +67 kg: Svetlana Osipova

Qayd etish joiz, Ulug‘bek Rashidov va Nigora Tursunqulova ham Ammandagi musobaqada Olimpiada yo‘llanmasiga ega chiqdi. Nigora Tursunqulova uchun bu faoliyatidagi ikkinchi Olimpiya o‘yinlari bo‘ladi. U 17 yoshida Rio—2016 Olimpiadasida ham ishtirok etgan.

Shu tariqa Tokio Olimpiya o‘yinlariga yo‘llanma olgan o‘zbekistonlik sportchilar soni 50 nafarga yetdi.