Mo‘ynoq tumanida 14—15-may kunlari an’anaviy tarzda o‘tkazib kelinayotgan “Stixiya” elektron musiqiy festivali bo‘lib o‘tgandi. Qoraqalpog‘iston Respublikasi Turizm va sport bosh boshqarmasi ijtimoiy tarmoqlarda festivalda yalang‘och holda o‘ynayotgani ta’kidlangan mehmonlarning tarqalgan videosiga munosabat bildirdi, deb yozadi “Kar24.uz”.

Foto: “Bugun.uz”

Ma’lum qilinishicha, festivalda Rossiya, Qozog‘iston, Turkiya va Qirg‘izistondan kelgan musiqiy prodyuserlar, musiqachilar va dijeylar ishtirok etgan. Forumda, shuningdek, O‘zbekiston va Rossiya olimlari, ekologlari, mutaxassislari hamda 300 nafarga yaqin sayyoh qatnashgan.

Festival doirasida “6 milliard daraxt” ijtimoiy aksiyasi o‘tkazilib, uning davomida Mo‘ynoq shahrida 5 mingdan ortiq daraxt ekish ko‘zda tutilgan. Ushbu loyihadan ko‘zlangan maqsad mintaqadagi ekologik vaziyatni yaxshilash uchun qurg‘oqchilikka chidamli bo‘lgan buta va mevali daraxtlarni Mo‘ynoq shahri hamda Orol dengizining pastki qismida bosqichma-bosqich ekishga yo‘naltirilgan.

Ijtimoiy tarmoqlarda mazkur festival davomida bo‘lgani aytilayotgan yalong‘och holda o‘ynayotgan qizning videolari tarqalmoqda.

“Festivalda Ichki ishlar vazirligi, Milliy gvardiya, Favqulodda vaziyatlar vazirligi, Sog‘liqni saqlash vazirligi tomonidan jamoat, yo‘l harakati va yong‘in xavfsizligi ta’minlandi hamda ishtirokchilarning sanitariya-gigiyena qoidalariga amal qilinishi nazorat qilingan. Tarmoqlarda tarqalgan nojo‘ya videolar ‘Stixiya’ elektron musiqa, madaniyat va ilm festivalidan olinmagan”, — deyiladi xabarda.

Eslatib o‘tamiz, 2021-yilning mart oxirlarida ijtimoiy tarmoqlarda yarimyalang‘och holda sumalak pishirayotgan xorazmlik ayol-qizlar tasvirlangan video tarqalgandi. Keyinroq ushbu ayollar kechirim so‘rab chiqqan.