Hindistonda so‘nggi 24 soat ichida 3780 kishi koronavirusdan vafot etdi, bu dunyo miqyosidagi yangi rekord, deb yozadi Reuters.

O‘tgan kun davomida mamlakatda yana 382 315 kishida COVID-19 qayd etildi.

Pandemiya boshidan beri Hindistonda infeksiya yuqtirganlarning umumiy soni 20 milliondan oshdi, 226 188 kishi kasallikdan vafot etdi. 3-may kuni mamlakatda infeksiyadan kunlik o‘limlar ko‘pligi bo‘yicha rekord o‘rnatilgandi. O‘sha kuni 3689 kishi koronavirus qurboniga aylangan.

Jons Hopkins universiteti statistik ma’lumotlariga ko‘ra, Hindiston koronavirus bilan kasallanganlar sonining ko‘pligi bo‘yicha dunyoda AQShdan keyin ikkinchi o‘rinda turadi.

So‘nggi bir hafta ichida butun dunyoda koronavirusdan 93 mingdan ortiq odam vafot etdi. Bu ko‘rsatkich avvalgi haftaga nisbatan olti foiz yuqori. Jahon Sog‘liqni saqlash tashkiloti (JSST)ning haftalik epidemiologik byulleteni ma’lumotlari shuni ko‘rsatmoqda.

Shuningdek, ushbu davrda COVID-19 bilan kasallanganlar soni avvalgi haftadagi singari 5,7 milliondan oshgani qayd etilgan.

“Jahon miqyosida ketma-ket ikkinchi hafta davomida COVID-19 bilan kasallanganlar soni pandemiya boshlanganidan buyon eng yuqori darajada saqlanib qolmoqda — to‘qqiz haftalik o‘sishdan so‘ng ushbu ko‘rsatkich 5,7 milliondan oshdi”, — dedi JSST.

Tashkilotning ta’kidlashicha, o‘limlar soni “ketma-ket yettinchi hafta davomida o‘sib bormoqda”.

Avvalroq JSST Hindistondagi koronavirus bilan bog‘liq og‘ir vaziyat istalgan davlatda yuz berishi mumkinligidan ogohlantirgan edi.