Akademik O‘tkir Rasulyev 82 yoshida vafot etdi
Akademik O‘tkir Rasulyev 4-may kuni 82 yoshida vafot etdi, deya xabar bermoqda O‘zbekiston Fanlar akademiyasi.
Ma’lumot uchun, O‘zbekiston Fanlar Akademiyasi Prezidiumi a‘zosi, Davlat mukofotlari sovrindori O‘tkir Rasulyev 1939-yil 11-iyulda Toshkent shahrida xizmatchi oilasida tug‘ilgan. 1956-yil Toshkentdagi 135-o‘rta maktabni oltin medal bilan tugatib, O‘rta Osiyo Davlat universiteti talabasi bo‘lgan va 1961-yili uni muvaffqiyatli tamomlagan.
1969-yil A.F.Ioffe nomidagi Fizika-texnika institutining Ilmiy kengashida nomzodlik dissertatsiyasini va 1979-yilda doktorlik dissertatsiyasini himoya qilgan, shu yillarda O‘tkir Rasulyev ishlab chiqarishda foydalanish darajasiga yetkazilgan birinchi “Valday” sirt-ionizatsion gaz analizatorlarini yaratgan va bu ixtirosi uchun birinchi mualliflik guvohnomasini olgan.
O‘tkir Rasulyev jahon andozalari darajasida ishlashi tan olingan A.F.Ioffe nomidagi FTI ilmiy maktabining tipik vakili va emission elektronikaning murakkab tarkibli molekulalarning qattiq jism sirtida ionlashish kabi yangi yo‘nalishi asoschilaridan biri bo‘lib, uning bu ilmiy yo‘nalishi geterogen kataliz, molekulalar fizikasi, kimyoviy fizika, organik birikmalarning fizikaviy kimyosi, mass-spetrometriya va gaz tahlili kabi tadqiqot sohalarini rivojlanishiga asos solgan.
O‘tkir Rasulyev 1985-2007-yillarda Fanlar Akademiyasining Elektronika institutiga rahbarlik qilgan. Uning rahbarligida va bevosita ishtirokida sirtiy ionlashuv usullari va asboblarni patentlash ishlari olib borilgan va natijada Rossiya, Germaniya, AQSh, Shveysariya, Italiya, O‘zbekistonning patentlari olingan. Rasulyev rahbarligida va bevosita ishtirokida 30 dan ziyod institut xodimlari Xalqaro Soros jamg‘armasining individual va uchta tadqiqot grantlarini olgan.
Avvalroq O‘zbekiston Fanlar akademiyasi akademigi Mirhoji Asqarov 89 yoshida, akademik Ra’no Ubaydullayeva 84 yoshida, akademik Shavkat Akmalxonov 87 yoshida vafot etgani to‘g‘risida xabar berilgandi. Shuningdek, O‘zbekiston Respublikasi Fanlar akademiyasi akademigi, adabiyotshunos olim To‘ra Mirzayev 2020-yil 29-sentabr kuni 84 yoshida, O‘zbekistonda xizmat ko‘rsatgan fan arbobi, O‘zbekiston Respublikasi Fanlar akademiyasi akademigi Tursunboy Rashidov 7-oktabr kuni 86 yoshida vafot etgandi.
