Namangan viloyat hokimining 2021-yil 28-apreldagi qaroriga asosan, Botirjon Nuriddinov viloyat hokimining turizm, sport, madaniyat, madaniy meros va ommaviy kommunikatsiyalar masalalari bo‘yicha o‘rinbosari — viloyat turizm va sport bosh boshqarmasi boshlig‘i lavozimiga tayinlandi. Bu haqda O‘zA xabar qilmoqda.
Botirjon Nuriddinov 1976-yil 14-dekabr kuni Namangan shahrida ziyolilar oilasida tug‘ilgan. Ma’lumoti oliy, 1998-yili Namangan muhandislik-pedagogika institutini, 2010-yili O‘zbekiston Prezidenti huzuridagi Davlat boshqaruvi akademiyasini, 2016-yil Yaponiya davlati Osiyo va Tinch okeani universitetini tamomlagan. Mutaxassisligi iqtisodchi-menejer, xalqaro aloqalar.
Mehnat faoliyatini 1998-yilda “O‘z-Elektroterm” aksionerlik jamiyati mutaxassisi vazifasidan boshlagan. U 2000–2020-yillar mobaynida Iqtisodiy nochor korxonalar ishlari bo‘yicha Namangan viloyati boshqarmasi, Namangan viloyati ko‘chmas mulk birjasi, “O‘zagrosug‘urta” Davlat aksionerlik sug‘urta kompaniyasi Namangan shahar bo‘limi, Namangan shahar hokimligi hamda Yaponiyadagi Hopeas savdo kompaniyasida turli mas’ul lavozimlarda faoliyat yuritgan.
Botirjon Nuriddinov 2020-yil 20-oktabrdan buyon hozirga qadar Namangan viloyati hokimining turizm va sport masalalari bo‘yicha maslahatchisi lavozimida ishlab kelgan.
Bundan avval Toshkent viloyati hokimiga, Andijon viloyati hokimiga, Navoiy viloyati hokimiga, Qashqadaryo hokimiga hamda Toshkent shahar hokimiga yangi o‘rinbosarlar tayinlangani haqida xabar berilgandi.
Izoh (0)