Farg‘ona shahrida qaynonasining mashinasini olib qochgan sobiq kuyov ushlandi, deya xabar bermoqda Tergov departamenti.

Ma’lum qilinishicha, 2021-yilning 29-aprel kuni Farg‘ona shahri bo‘yicha IIO FMBga 48 yoshli E.O‘. ismli ayol ariza bilan murojaat qilib, unda shu kuni soat 09:30 larda Farg‘ona shahri Marg‘ilon ko‘chasida joylashgan yashash xonadonida turgan, o‘ziga tegishli Nexia-3 rusumli avtomashinasini sobiq kuyovi 30 yoshli A.I. olib qochganini, avtomashinasini topib, A.I.ga nisbatan qonuniy chora ko‘rishni so‘ragan.

Olib borilgan tezkor-qidiruv harakatlari davomida fuqaro E.O‘.ga tegishli Nexia-3 rusumli avtomashina Farg‘ona tumani “Oqbilol” mahallasi hududidagi dala yer maydoniga tashlab ketilganligi aniqlanib, A.I. protsessual tartibda ushlangan.

Mazkur holat yuzasidan Farg‘ona shahri bo‘yicha IIO FMB huzuridagi tergov bo‘limi tomonidan A.I.ga nisbatan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan.

Tergov harakatlari davomida sobiq kuyov A.I. oilaviy muammolari tufayli ushbu jinoyatni sodir qilganligi aniqlangan. Hozirda tergov davom etmoqda.

Bundan avval Qashqadaryoda homilador xotini, qaynonasi va ikki nafar bolani pichoqlab o‘ldirgan erkak umrbod qamoq jazosiga hukm qilingani, Samarqandda sobiq turmush o‘rtog‘ining uyiga farzandini ko‘rishga kelgan erkak qaynonasini o‘roq bilan urib o‘ldirgani hamda Namanganda aliment talab qilinganidan darg‘azab kuyov sobiq qaynotasini o‘ldirib, uyini yoqib yuborgani haqida xabar berilgandi.