АҚШ президенти Жо Байден президентлик фаолиятига 100 кун тўлиши арафасида Капитолийда Конгрессга биринчи марта мурожаат қилиб, нутқ сўзлади. Бу ҳақда Reuters хабар берди.
Нашрнинг маълум қилишича, Байден мамлакатдаги оилаларга 1,8 триллион долларлик ёрдам режасини тақдим этди, бу ташаббусни бойлар учун солиқ ставкаларининг оширилиши эвазига молиялаштириш кўзда тутилган.
Режага кўра, ўн йил давомида бир триллион доллар таълим ва болалар парвариши соҳаларига, яна 800 миллиард доллар ўртача ва паст даромадли оилалар учун солиқ имтиёзларига йўналтирилади.
Байден энг бой америкаликлар учун солиқлар чегарасини 37 фоиздан 39,6 фоизгача оширишни таклиф қилди. Associated Press’нинг ёзишича, солиқларни ошириш 10 йил давомида 1,5 триллион доллар тўплашга ёрдам беради. Аввалроқ Байден йиллик маоши 400 минг доллардан кам бўлган аҳолига солиқ ставкаларининг ўсиши таъсир кўрсатмаслигига ваъда берган эди.
Шунингдек, Байден ўз нутқида АҚШ фуқароларини президент ва унинг маъмурияти учун асосий стратегик рақиб бўлган Хитой рақобатига қарши туришга чақирди.
2021 йилнинг март ойида АҚШ Конгресси мамлакат иқтисодиётига аксарият аҳоли учун 1400 долларлик тўғридан-тўғри тўловларни тақдим этувчи 1,9 триллион доллар миқдорида маблағ ажратиш режасини тасдиқлади.
29 апрель куни Жо Байденнинг президентлик лавозимини эгаллаганига 100 кун тўлди.
Маълумот учун, АҚШ президенти Жо Байденнинг рейтинги фаолиятининг биринчи 100 кунида 52 фоизни ташкил қилди. 1945 йилдан буён бу кўрсаткич фақат Жералд Форд (48 фоиз) ва Дональд Трампда (42 фоиз) пастроқ бўлган.
Аввалроқ Жо Байден давлат хизматчиларининг энг кам иш ҳақини соатига 15 долларгача кўтаришни назарда тутувчи фармонга имзо чекди.
Жо Байден июнь ойида давлат раҳбари сифатида биринчи бор чет элга сафар қилиши ҳақида хабар берилди. У Буюк Британия ва Бельгияга боради. Унинг чет эл раҳбари билан биринчи телефон суҳбати 23 январь куни Канада бош вазири Жастин Трюдо билан бўлиб ўтди. Бир неча кундан кейин Байден Путин билан телефонда гаплашди, суҳбат тахминан ярим соат давом этди.
Шунингдек, Оқ уй Россияга қарши киритилган санкцияларнинг натижаларига баҳо берди ва уларни ҳозирча президент Жо Байден маъмурияти кутган натижаларга «жуда яқин», деб атади.
Изоҳ (0)