Turkmaniston prezidenti Gurbanguli Berdimuhamedovning o‘g‘li, mamlakat bosh vaziri o‘rinbosari va Oliy nazorat palatasining rahbari Serdar Berdimuhamedov otasining o‘rniga Axaltekin otlarini yetishtirish bo‘yicha assotsiatsiyaning prezidentligiga saylandi. Bu haqda Atavatan Turkmenistan nashriga asoslanib, “Interfaks” xabar bergan.
Assotsiatsiyaga u tashkil qilingandan beri, ya’ni 2010-yildan buyon Gurbanguli Berdimuhamedov rahbarlik qilib kelayotgandi, uning o‘zi 16-aprelda o‘tkazilgan yig‘ilishda boshqa bir munosib nomzodni assotsiatsiya prezidentligiga saylashni taklif etgan. Assotsiatsiya vakillari bosh vazir o‘rinbosari Serdar Berdimuhamedov nomzodini ilgari surgan va ma’qullagan.
Serdar Berdimuhamedov bir ovozdan assotsiatsiya prezidentligiga saylangan. U yangi lavozimga kirishish oldidan axaltekin otlarining dovrug‘ini butun dunyoga ko‘z-ko‘z qilish, chavandozlik milliy san’atini yanada rivojlantirish hamda axaltekin otlarining dunyo miqyosidagi obro‘sini yanada oshirish uchun bor kuchini safarbar etishga tayyorligini bildirgan.
Shuningdek, ushbu yig‘ilishda Xalq maslahati Parlament palatasining qarori bilan prezident Gurbanguli Berdimuhamedovga “Turkmaniston otlarining murabbiyi – mahoratli ustoz” faxriy unvoni berilgan.
Mavzuga doir: Berdimuhamedov Navro‘z kuni tug‘ilgan toychoqqa Ashxobod deb nom qo‘ydi va poytaxtga bag‘ishlab she’r yozdi
Izoh (0)