Google kompaniyasi past va o‘rta daromadli mamlakatlarning 250 ming aholisi uchun koronavirusga qarshi vaksina sotib olishni moliyalashtiradi. Bu haqda Meduza xabar berdi.
Google blogidagi xabarda aytilishicha, kompaniya pullarni GAVI (Global Alliance for Vaccines and Immunisation — Vaksina va immunizatsiya xalqaro ittifoqi)ga yo‘naltiradi. GAVI qashshoq mamlakatlarda vaksina olish imkoniyatini oshirish uchun kurashuvchi xususiy va davlat tashkilotlarining hamkorligi hisoblanadi.
Shuningdek, vaksinalar haqidagi aniq ma’lumotlarni keng tarqatish uchun Google 250 million dollar miqdoridagi mablag‘ni bepul reklama ko‘rinishida taqdim etadi. Bu imkoniyatni kompaniya hukumatlarga, birlashmalarga va tashkilotlarga, shu qatorda, Jahon sog‘liqni saqlash tashkiloti (JSST)ga beradi. Google bu maqsadlar uchun jami 800 million dollar ajratdi.
Avvalroq Xitoy COVAX dasturi doirasida rivojlanayotgan davlatlar uchun COVID-19’ga qarshi 10 million doza vaksina taqdim qilishi haqida xabar berilgandi.
COVAX — JSST doirasidagi xalqaro mexanizm. Loyihaga ko‘ra, koronavirus pandemiyasiga qarshi kurash uchun 190 ta mamlakat va iqtisodiyotlarga ko‘mak ko‘rsatiladi.
BMTning inson huquqlari va xalqaro birdamlik masalalari bo‘yicha mustaqil eksperti Obiora Okafor 22-yanvarda aholisini COVID-19’ga qarshi vaksinalar bilan ta’minlagan, yuqori daromadli davlatlar COVAX doirasida boshqalarga ko‘mak berishga e’tibor qaratishi lozimligini bildirgandi.
Jahon sog‘liqni saqlash tashkiloti rahbari Tedros Adan Gebreyesus 17-yanvarda turli mamlakatlarda yashovchi aholini koronavirus infeksiyasiga qarshi emlash muammosining yechimini topish tobora murakkablashib borayotganini qayd etgan.
Izoh (0)