Ramzan Qodirov Navalniyni provokatsiyalar uchun Qur’ondan foydalanishga urinishda aybladi

Checheniston rahbari Ramzan Qodirov koloniyada jazo o‘tayotgan rossiyalik muxolifatchi Aleksey Navalniyning Qur’on tilovat qilmoqchiligini tanqid qildi. Bu haqda Qodirov Telegram-kanalida yozgan, deb xabar beradi “RBK”.

Qodirovning so‘zlariga ko‘ra, Navalniy Qur’ondan siyosiy maqsadda foydalanmoqchi. Ilgari Navalniy musulmon ayollarning hijob kiyishini “o‘rta asrlardan qolgan vahshiylik” deb atagan. Shuningdek, Moskvada “barcha muhojirlar uchun” masjidlar qurilishiga, umuman O‘rta Osiyo va Kavkaz mamlakatlariga tegishli migratsiya mavzusiga qarshi chiqqan.

“Ortiqcha izohlarsiz ham bu islomofob Muqaddas Bitikni o‘zining siyosiy maqsadlari uchun ishlatishga intilayotgani va ilgari Yevropada o‘rganib kelganidek, provokatsiyalar uchun foydalanishi kundek ravshan”, — dedi Checheniston rahbari.

Shuningdek, u Navalniy islomni qabul qilib, “haqiqat yo‘lidan borishni” istayotganiga shubha bildirdi va qamoqxona xodimlarini “mahbusning mazhablararo nizo qo‘zg‘ashiga yo‘l qo‘ymaslikka” chaqirdi. Qodirovning ta’kidlashicha, musulmon oilalarida Qur’on sharafli joyda saqlanib, unga hurmat bilan qaraladi.

“Navalniy unga Qur’on bilan xohlagan ishini qilishga ruxsat beradigan odam emas. U o‘z vatanini sotgan dushman va xoin, shunchaki o‘zini bechora ko‘rsatib, odamlar e’tiborini tortish uchun har qanday provokatsiyani amalga oshirishga tayyor. Undan ko‘ra hujrasi burchagida o‘tirib, o‘z qilmishlari haqida o‘ylasin. Bunga uning vaqti yetarli”, — dedi Checheniston rahbari. Shuningdek, Qodirov Navalniyning qarashlari va turmush tarzi “islom dini u yoqda tursin, birorta e’tiqod bilan hech qanday aloqasi yo‘q” deya qo‘shimcha qildi.

Navalniy Vladimir viloyatidagi 2-sonli axloq tuzatish koloniyasida saqlanmoqda. 13-aprel kuni Navalniyning Instagram’ida siyosatchi koloniya ma’muriyatini unga Qur’on o‘qishni taqiqlagani uchun sudga bergani haqida xabar paydo bo‘ldi. Xabarda aytilishicha, Navalniy Qur’onni “chuqur o‘rganish va tushunish” uchun boshqa kitoblar bilan birga koloniyaga olib kelgan. Biroq koloniya zobitlari ularni ekstremizmga qarshi tekshirish kerakligini aytib, olib qo‘yganicha hali qaytarib bermagan.

“Qur’onni ekstremizm uchun tekshirish nima ekanini tushunmayapman. Umuman, bu qanday olib boriladi? Nazorat ofitseri Pokrov shahridagi 2-koloniyada o‘tirib, bir yarim milliard kishining muqaddas kitobini ekstremizmga tekshirmoqda. Agar u ekstremizmni topsa, Qur’on o‘qishni taqiqlaydi. Bu ish nafaqat noqonuniy va bema’ni, balki dindorga ham, har qanday o‘qimishli odamga ham haqorat hisoblanadi”, — deyiladi Navalniy bayonotida.

Navalniy koloniyaga qarshi sudga murojaat qilgan. “Kitoblar bizning shaxsiy mulkimiz va agar o‘qish huquqi uchun sudga murojaat qilish kerak bo‘lsa, men sudga murojaat qilaman”, — deya xulosa qilgan muxolifatchi.

Avvalroq koloniyada saqlanayotgan Navalniyning ahvoli yomonlashayotgani, unda ikkita umurtqa churrasi aniqlangani haqida xabar berilgandi.

Eslatib o‘tamiz, Aleksey Navalniy koloniyada unga boshqa joydan shifokor chaqirishni talab qilib, 31-martdan buyon ochlik e’lon qilib kelmoqda. Jazolarni ijro etish federal xizmati zarur yordam ko‘rsatilayotganini ta’kidlamoqda.