Ayni paytda Prezident Shavkat Mirziyoyev raisligida o‘tkazilayotgan yig‘ilishda davlat rahbari respublikadagi mavjud 120 ta IT-markazlarni tamomlagan 4 mingga yaqin “yoshlar daftari”dagi yigit-qizlarni kompyuterlar bilan ta’minlab berish zarurligini qayd etdi, deya xabar bermoqda “Daryo” muxbiri.

“IT-markazlarni tamomlagan 4 mingga yaqin ‘yoshlar daftari’dagi yoshlarni kelgusida biznes boshlashi uchun kompyuterlar bilan ta’minlab berish zarur. Buning uchun, ‘Bir million dasturchi’ loyihasi doirasida sertifikat olgan yoshlarga kompyuterlar xaridi uchun ‘Mikrokreditbank’, ‘Aloqabank‘ va ‘Xalq banki’ kreditlar ajratadi, ularning foiz xarajatlari to‘liq budjetdan qoplab beriladi ya’ni, kredit foizsiz beriladi.

Shuningdek, 1-iyundan boshlab ‘yoshlar daftari’ga kiritilgan yoshlarga va mehribonlik uyi tarbiyalanuvchilariga haydovchilik guvohnomasini olish, bir oylik harbiy xizmatni o‘tash xarajatlari budjetdan to‘lab beriladi.

Bundan tashqari, ‘yoshlar daftari’ga kirganlarga, qiziqishidan kelib chiqib, xorijiy tillar va umumta’lim fanlari bo‘yicha nodavlat ta’lim tashkilotlarida o‘qish xarajatining bir qismi qoplanadi. Shu bilan birga, 1-iyuldan boshlab xususiy korxonalarda yangi ish boshlagan xodimlarni qayta tayyorlash xarajatining 1 million so‘mgacha bo‘lgan qismiga subsidiya beriladi. Yoshlarning professional ta’lim maktablari, texnikumlarda o‘qishi uchun to‘lanadigan kontrakt summasi daromad solig‘idan ozod qilinadi”, – dedi Shavkat Mirziyoyev.

Prezident ushbu maqsadlar uchun Moliya vaziri Timur Ishmetovga Yoshlar agentligiga yil davomida qo‘shimcha 100 milliard so‘m ajratish bo‘yicha topshiriq berdi.

Bundan avval Shavkat Mirziyoyev Andijonda sanoat korxonalari va klasterlarda 7 mingta doimiy vakant ish o‘rinlari mavjud ekanini ma’lum qilgani, yoshlar bilan ishlashni eplay olmagan bir qator amaldorlarni ishdan olgani hamda SSP raisini “1+1” dasturi orqali 1 mln yigit-qizni qamrab olmasa, ishdan olinishi haqida ogohlantirgani haqida xabar qilingandi.