Nigeriyaning Imo shtatidagi Overri shahri markaziy qamoqxonasidan 5-aprel, dushanba kuni kamida ikki ming mahbus qochib ketdi. Bu haqda The Nation nashriga tayanib “Korrespondent.net” xabar berdi.
Foto: The Guardian
Ta’kidlanishicha, mahalliy vaqt bilan soat 01:00 da qurollangan jangarilar shtat hukumati binosining yaqinida joylashgan qamoqxonaga hujum uyushtirdi va eng kamida ikki ming nafar mahbusni ozod qildi. Avvalroq The Guardian gazetasi qamoqxonadan 1,5 ming mahbus qochgani haqida xabar berdi.
Jangarilar qamoqxona devorining bir qismini buzish uchun dinamitdan foydalandi. Shundan keyin bino o‘qqa tutildi va bir nafar politsiyachi qurbon bo‘ldi. Guvohning so‘zlariga ko‘ra, qurollangan guruh armiya raqami taqilgan mashinada asosiy kirish joyiga kelgan.
Hozir qamoqxonaga qo‘shimcha harbiy bo‘linmalar jalb etilgan. Qochgan mahbuslar qidirilmoqda.
Shuningdek, qamoqxonaga qilingan hujum bilan bir vaqtda Imo shtatining markaziy politsiya bo‘limiga ham hujum uyushtirildi. Natijada tergov hibsxonasida bo‘lgan yana 600 ga yaqin kishi qochib ketdi. Keyin jangarilar binoni va xizmat avtomashinalarini yoqib yubordi.
Avvalroq “Ash-Shabob” terrorchi guruhi Somalining shimoli-sharqidagi Bosaso shahrida joylashgan qamoqxonani egallab olib, yuzlab mahbuslarni qochirib yuborgani haqida xabar berilgandi. Otishmada sakkiz kishi halok bo‘ldi. Politsiyachilarga qo‘shimcha kuchlar yetib kelib, qamoqxonani qaytarib olguncha jangarilar binoni o‘z nazoratiga olishga muvaffaq bo‘ldi.
Gaiti poytaxti Port-o-Prens shahrida esa qamoqxonadan 400 dan ortiq mahbus qochib ketdi. Qochish oqibatida 25 kishi, xususan, qamoqxona direktori ham vafot etdi.
