Нигериянинг Имо штатидаги Оверри шаҳри марказий қамоқхонасидан 5 апрель, душанба куни камида икки минг маҳбус қочиб кетди. Бу ҳақда The Nation нашрига таяниб «Korrespondent.net» хабар берди.
Таъкидланишича, маҳаллий вақт билан соат 01:00 да қуролланган жангарилар штат ҳукумати биносининг яқинида жойлашган қамоқхонага ҳужум уюштирди ва энг камида икки минг нафар маҳбусни озод қилди. Аввалроқ The Guardian газетаси қамоқхонадан 1,5 минг маҳбус қочгани ҳақида хабар берди.
Жангарилар қамоқхона деворининг бир қисмини бузиш учун динамитдан фойдаланди. Шундан кейин бино ўққа тутилди ва бир нафар полициячи қурбон бўлди. Гувоҳнинг сўзларига кўра, қуролланган гуруҳ армия рақами тақилган машинада асосий кириш жойига келган.
Ҳозир қамоқхонага қўшимча ҳарбий бўлинмалар жалб этилган. Қочган маҳбуслар қидирилмоқда.
Шунингдек, қамоқхонага қилинган ҳужум билан бир вақтда Имо штатининг марказий полиция бўлимига ҳам ҳужум уюштирилди. Натижада тергов ҳибсхонасида бўлган яна 600 га яқин киши қочиб кетди. Кейин жангарилар бинони ва хизмат автомашиналарини ёқиб юборди.
Аввалроқ «Аш-Шабоб» террорчи гуруҳи Сомалининг шимоли-шарқидаги Босасо шаҳрида жойлашган қамоқхонани эгаллаб олиб, юзлаб маҳбусларни қочириб юборгани ҳақида хабар берилганди. Отишмада саккиз киши ҳалок бўлди. Полициячиларга қўшимча кучлар етиб келиб, қамоқхонани қайтариб олгунча жангарилар бинони ўз назоратига олишга муваффақ бўлди.
Гаити пойтахти Порт-о-Пренс шаҳрида эса қамоқхонадан 400 дан ортиқ маҳбус қочиб кетди. Қочиш оқибатида 25 киши, хусусан, қамоқхона директори ҳам вафот этди.
Изоҳ (0)