“Yoshlar — kelajagimiz” jamg‘armasi sobiq bosh hisobchisi katta miqdordagi kamomadga yo‘l qo‘ygani sabab ishdan bo‘shatildi. Bu haqda jamg‘arma matbuot xizmati xabar berdi.
Ma’lum qilinishicha, “Yoshlar — kelajagimiz” jamg‘armasi sobiq bosh hisobchisi A.U. jamoa o‘rtasida muntazam ravishda nosog‘lom muhitning yuzaga kelishiga sababchi bo‘lgani uchun ishdan bo‘shatilgan. Mazkur holat sud jarayoni orqali ham o‘z tasdig‘ini topgan.
Shuningdek, ta’kidlanishicha, A.U.ning faoliyati o‘rganilganda ushbu kamomad jamg‘arma tomonidan aniqlangan. Holat yuzasidan to‘plangan hujjatlar prokuratura organlariga taqdim etilgan. Bugungi kunda bosh hisobchidan qariyb 500 million so‘m undirilgan va uning mol-mulki xatlovga olingan.
“Mazkur holatga befarq bo‘lmay, ijtimoiy tarmoqlarda o‘z fikr va mulohazalarini bildirayotgan faol fuqarolarimizga shuni ma’lum qilamizki, o‘z nafsini jilovlay olmaydigan bir nafar xodimning xatti-harakatlari butun tashkilotga nisbatan salbiy baho berish uchun asos bo‘lmasligi kerak”, — deyiladi xabarda.
Toshkent viloyati prokuraturasining ma’lumotlariga ko‘ra, “Yoshlar — kelajagimiz” jamg‘armasiga ajratilgan mablag‘lar hisob raqamidan Markaziy apparati sobiq bosh hisobchisi A.U. o‘zining shaxsiy plastik kartasiga (“Davr bank” Yunusobod filialidan ochilgan) 2020-yil 7-fevral kuni 50 million so‘m, 2-mart sanasida esa 150 million so‘m o‘tkazgan. Shuningdek, u o‘zining ta’sisligidagi oilaviy korxonasining (“Xalq banki” Zangiota filialidan ochilgan) hisob raqamiga 21-iyulda hech qanday hujjatlarsiz 991 million so‘mdan ortiq pulni o‘tkazib, jami 1 milliard 191,3 million so‘m pulni o‘zlashtirish yo‘li bilan talon-toroj qilgan.
Ma’lumot uchun, O‘zbekistonda “Yoshlar — kelajagimiz” jamg‘armasi va uning shahar-tuman filiallari O‘zbekiston Prezidentining 2018-yil iyundagi “Yoshlar — kelajagimiz” davlat dasturi to‘g‘risidagi farmoni bilan tashkil etilgan.
Izoh (0)