Surxondaryoda pochchasi va ikki nafar qarindoshiga pichoq urgan shaxsga jinoyat ishi qo‘zg‘atildi

Ijtimoiy tarmoqlarda Surxondaryo viloyati Sarosiyo tumanida 3 nafar zo‘ravon bir necha kishini pichoqlab va yana bir qanchasini do‘pposlagani, lekin zo‘ravonlarga nisbatan hech qanday chora ko‘rilmagani aytilgan xabar va ushbu voqea aks etgan video tarqaldi.

Surxondaryo viloyati IIB matbuot xizmatining ma’lum qilishicha, mazkur holat yuzasidan Sariosiyo tumani IIB mas’ul xodimlari tomonidan tergovga qadar tekshiruv harakatlari olib borildi.

Dastlabki to‘plangan hujjatlarga ko‘ra, 10-fevral kuni soat taxminan 14:30 Sariosiyo tumani “Gulobod” mahallasida yashovchi fuqaro O.T. va uning o‘rtog‘i M.R. Sariosiyo tumani “Nurobod” mahallasida yashovchi pochchasi R.M.ning yashash uyi yoniga gaplashib olish uchun kelib, o‘rtalarida oldindan bo‘lgan nizo sababli janjallashib qolgan. O.T. o‘zi bilan olib kelgan pichoq bilan pochchasi fuqaro R.M. va qarindoshlari F.M. hamda M.H.larga kesilgan jarohat yetkazgan.

Respublika sud-tibbiy ekspertiza ilmiy-amaliy markazi Surxondaryo filiali Uzun punktining 15-fevraldagi xulosalariga ko‘ra, fuqaro F.M.ga sog‘lig‘ining buzilishiga sababchi bo‘lgan yengil tan jarohati, R.M.ga o‘rtacha og‘ir shikastlar tan jarohati, O.T., M.R. va M.H.ga esa yengil tan jarohatlari yetkazilgani ko‘rsatilgan.

Holat yuzasidan 16-fevral kuni fuqaro O.T.ga nisbatan Jinoyat kodeksining 105-moddasi (qasddan badanga o‘rtacha og‘ir shikast yetkazish) 2-qismi “m” bandi va 109-moddasi (qasddan badanga yengil shikast yetkazish) 2-qismi bilan Sariosiyo tumani IIB huzuridagi Tergov bo‘linmasi tomonidan jinoyat ishi qo‘zg‘atilib, dastlabki tergov harakatlari olib borilmoqda.