O‘zbekistonda 2030-yilgacha aholini ijtimoiy himoya qilishning Milliy strategiyasi ishlab chiqiladi
Shavkat Mirziyoyev “2021—2030-yillarda O‘zbekiston Respublikasi aholisini ijtimoiy himoya qilish tizimini takomillashtirish chora-tadbirlari to‘g‘risida”gi farmoyishni imzoladi, deb xabar bermoqda Moliya vazirligi matbuot xizmati.
Ushbu farmoyish bilan 2021—2030-yillarda aholini ijtimoiy himoya qilish Milliy strategiyasi konsepsiyasi va strategiyani ishlab chiqish bo‘yicha “Yo‘l xaritasi” tasdiqlandi va strategiyani ishlab chiqish bo‘yicha Respublika ishchi guruhi tuzildi.
Konsepsiya doirasida:
- aholini ijtimoiy himoya qilish Milliy strategiyasi ishlab chiqiladi va unda ijtimoiy himoya sohasida ijtimoiy yordam va xizmatlarning bazaviy kafolatlari belgilanadi, ilg‘or amaliyotlarda qabul qilingani kabi onalikni himoya qilish va vaqtinchalik mehnatga layoqatsizlik bo‘yicha nafaqalarni ijtimoiy sug‘urta tizimiga kiritish hamda Ijtimoiy sug‘urta jamg‘armasini tashkil etish masalasi o‘rganiladi;
- barcha kam ta’minlangan oilalarni ijtimoiy nafaqalar bilan qamrab olish maqsadida ijtimoiy nafaqalarni tayinlash uchun ariza beruvchilarning muhtojlik darajasini aniqlash jarayonlarini soddalashtirish hamda ijtimoiy nafaqalarni tayinlash va to‘lash jarayonlarini tezlashtirishga e’tibor qaratiladi;
- davlat budjeti mablag‘lari hisobidan ishsiz fuqarolarning bandligini ta’minlash uchun berilayotgan subsidiyalar samaradorligini oshirish maqsadida ijtimoiy kontrakt tizimini joriy etish ko‘zda tutiladi. Davlat tomonidan aholiga ko‘rsatiladigan ijtimoiy xizmatlarning samaradorligini oshirish maqsadida ijtimoiy xizmatlarni individual ijtimoiy moslashuv dasturlari orqali taqdim etish tizimi ishlab chiqiladi.
Farmoyishda ko‘zda tutilgan chora-tadbirlar BMTning Barqaror rivojlanish maqsadlari kambag‘allikni kamaytirish, ijtimoiy himoyani kuchaytirish hamda ayollar, erkaklar, shu jumladan, yoshlar va nogironlarni to‘liq, foydali va munosib ish bilan ta’minlashga yordam berishi kutilmoqda.
Xalqaro mehnat tashkiloti, YuNISEF va Jahon bankining O‘zbekistondagi ijtimoiy himoya tizimini baholash bo‘yicha 2020-yilgi qo‘shma hisobotida O‘zbekiston aholisining deyarli yarmi ijtimoiy himoya bilan ta’minlanmagani qayd etilgandi.
