Prezident Shavkat Mirziyoyev raisligida o‘tkazilayotgan yoshlar bilan ishlashning yangicha tizimini joriy etish borasidagi dolzarb vazifalarga bag‘ishlangan videoselektor yig‘ilishida davlat rahbari Kogon shahar sektor rahbarlari faoliyati tanqid qildi, deya xabar bermoqda “Daryo” muxbiri.
“Afsuski, joylardagi o‘rganishlar yoshlar o‘rtasidagi muammolarni aniqlash va tizimli hal etish borasida haligacha ko‘plab kamchiliklar saqlanib qolayotganini ko‘rsatmoqda. Misol uchun, Kogon shahar 2-sektor rahbari – shahar prokurori yoshlar bilan uchrashuvda ularning 3 nafarini bir hafta muddatda ish bilan ta’minlayman deb, va’da bergan. Lekin oradan bir oy vaqt o‘tgan bo‘lsa-da, natija yo‘q.
Kogon shahridagi qolgan sektor rahbarlari ham mahallalarga tushib ishlamayapti. Buning ustiga, yoshlarni kasb-hunarga o‘qitish, bandligini ta’minlash yoki tadbirkorlikka jalb qilish ham o‘z holiga tashlab qo‘yilgan.
Yoshlarning tadbirkorlik faoliyati uchun kredit ajratishda ham ko‘plab muammolar saqlanib qolmoqda. Misol uchun, o‘tgan yili yoshlar tadbirkorligi uchun 3 ta yirik bankka (Ipoteka, Agrobank va Sanoat qurilish bank) kelib tushgan 13 mingta murojaatning 32 foizi ijobiy hal etilgan, xolos. Afsuski, yoshlarning bo‘sh vaqtini mazmunli tashkil etishda ham tizimli muammolar mavjud. Aksariyat madaniyat markazlari, istirohat bog‘lari va sport komplekslarining moddiy-texnik bazasi qoniqarsiz, to‘garaklar nomiga ishlayapti”, – dedi Prezident.
Davlat rahbari Buxoro viloyati hokimi Botir Zaripovga Kogon shahar sektor rahbarlarini ishdan olish bo‘yicha topshiriq berdi.
Avvalroq Shavkat Mirziyoyev O‘zbekistondagi 18-30 yoshlilar orasidagi rasmiy ishsizlar sonini ma’lum qilgani hamda bosh vazir va administratsiya rahbaridan ruxsat so‘ramay majlis o‘tkazgan amaldor ishdan olinishini ta’kidlagani haqida xabar berilgandi.
Izoh (0)