Qashqadaryoda YPX xodimining qonuniy talablariga bo‘ysunmasdan unga qarshilik ko‘rsatib, avtomobilida voqea joyidan ketib qolgan haydovchi 8 sutkaga qamaldi, deb xabar beradi IIV YHXBB axborot xizmati.
Ma’lum qilinishicha, 25-yanvar kuni belgilangan taqsimot asosida Shahrisabz tumani Chorshanbe qo‘rg‘onida xizmat olib borgan YPX xodimlari B.Xo‘jaqulov va X.Yo‘ldoshev tomonidan soat 12:10 larda ushbu hududda joylashgan tibbiyot birlashmasi binosi ro‘parasida davlat raqam belgisi bo‘lmagan Cobalt rusumli avtomobil to‘xtatilgan.
YPX xodimi me’yoriy hujjatlarini so‘ragan vaqtida haydovchi hujjatlari yo‘qligini ma’lum qilgan. Xodimlar belgilangan tartibda chora ko‘rishi zarurligini aytganida haydovchi ularga qarshilik ko‘rsatgan va o‘zaro tortishuv sabab atrofda fuqarolar to‘planishiga sabab bo‘lgan.
“Haydovchi qarshilik ko‘rsatishda davom etib, avtomobilda voqea joyidan ketib qolgan”, — deyiladi xabarda.
YPX xodimi belgilangan tartibga ko‘ra, YHXB boshlig‘i nomiga bildirgi orqali murojaat qilgan. Bildirgi asosida surishtiruv ishlari olib borilib, haydovchi aniqlangan va unga nisbatan to‘plangan hujjatlar ko‘rib chiqishli uchun Jinoyat ishlari bo‘yicha Shahrisabz tuman sudiga yuborilgan.
Sud tomonidan haydovchi O.X. Ma’muriy javobgarlik to‘g‘risidagi kodeksning 194-moddasi (ichki ishlar organlari xodimining qonuniy talablarini bajarmaslik) 1-qismi va 195-moddasida (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) ko‘rsatilgan huquqbuzarliklarni sodir etgan deya topilib, unga 8 sutka ma’muriy qamoq jazosi tayinlangan.
Avvalroq Toshkentda YPX xodimini kaltaklagan ikki sudya lavozimidan olingani, ularning sherigiga hayfsan berilgani hamda Oqqo‘rg‘onda YPX xodimining pogonini va kamerasini yulib olgan 3 yo‘lovchi 15 sutkaga qamalgani haqida xabar berilgandi.
Izoh (0)