Boks bo‘yicha super o‘rta vazn toifasida WBC va WBA chempionlik kamarlari sohibi Saul “Kanelo” Alvares (54-1-2, 36 KO) navbatdagi jangini Avni Yildirimga (21-2-0, 12 KO) qarshi o‘tkazadi. Bu haqda DAZN rasman ma’lum qildi.
Jang 27-fevral kuni bo‘lib o‘tadi. Unda Kanelo chempionlik kamarlarini himoya qiladi.
Avvalroq The Athletic jurnalisti Mayk Koppinjer jang 27-fevral kuni Mayamidagi (AQSh) Hard Rock stadionida bo‘lib o‘tishini xabar qilgandi.
Meksikalik bokschi 20-dekabrda super o‘rta vaznda WBA chempioni Kallum Smitni (27-1, 19 KO) mag‘lubiyatga uchratib, undan kamarni tortib olgandi. Keyinchalik Kanelo o‘rta vaznning WBA kamaridan voz kechdi.
29 yoshli turkiyalik bokschi so‘nggi jangini 2019-yilning fevralida Entoni Dirrellga qarshi o‘tkazgan. WBC’ning vakant kamari uchun kechgan jangda Yildirim mag‘lubiyatga uchragandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)