Mo‘g‘uliston bosh vaziri Uxnaagiyn Xurelsux tug‘ganiga ko‘p vaqt bo‘lmagan, koronavirus bilan kasallangan ayolni issiq kiyimlarsiz boshqa shifoxonaga ko‘chirilgani bois bo‘lib o‘tgan noroziliklardan so‘ng iste’fo berdi. Bu haqda “RBK” xabar qilmoqda.

Foto: “RIA Novosti”

“Yoshlarning hukumatga norozilik bildirish uchun ko‘chalarga chiqqani to‘g‘ri. Davlat hammani ko‘radigan va tinglaydigan bo‘lishi kerak. Shuning uchun xalq hukumatga so‘zini aytdi va bosh vazirdan adolat hamda javobgarlikni talab qildi”, – dedi bosh vazir.

Bundan avval bosh vazir o‘rinbosari, Koronavirusga qarshi kurash bo‘yicha davlat favqulodda komissiyasi rahbari Yangugiyn Sodbaatar va Sog‘liqni saqlash vazirligi rahbari Tog‘tolin Munxsayxan ham iste’foga chiqishini e’lon qilgan.

Gap shundaki, 19-yanvar kuni ijtimoiy tarmoqlarda bir necha soat oldin tug‘gan ayol va uning chaqalog‘i tug‘ruqxonadan issiq kiyim, poyabzal va shaxsiy himoya vositalarisiz yuqumli kasalliklar shifoxonasiga o‘tkazilgani aks etgan video paydo bo‘lgan.

Ushbu video jamoatchilikning noroziligiga sabab bo‘ldi. Shundan so‘ng Ulan-Bator markazida norozilik harakati bo‘lib o‘tdi.

Mo‘g‘uliston Sog‘liqni saqlash vazirligining so‘nggi ma’lumotlariga ko‘ra, mamlakatda 1584 nafar kishida koronavirus infeksiyasini yuqtirish holatlari aniqlangan bo‘lib, bemorlarning 1046 nafari sog‘ayib ketgan.

Avvalroq Qirg‘iziston hukumati Japarovning prezident saylovlaridagi g‘alabasidan so‘ng iste’foga chiqqani, Niderlandiya hukumati bolalar nafaqasi bilan bog‘liq mojaro fonida hamda Estoniya bosh vaziri korrupsiya mojarosi fonida iste’fo bergani haqida xabar berilgandi.