Janubiy Afrika Respublikasi (JAR)da dekabrda aniqlangan koronavirus shtammining yuqumlilik darajasi juda yuqori, ishlab chiqilgan vaksinalar unga qarshi samarasiz bo‘lishi mumkin. “RBK”ning xabar berishicha, Keyptaun va Pretoriya virusologlari bilan birgalikda tadqiqot o‘tkazgan Yoxannesburg sog‘liqni saqlash xizmati Milliy laboratoriyasi olimlari shunday xulosaga kelgan. Tadqiqot natijalari bioarxiv portalida e’lon qilingan.
Olimlar 501Y.V2 deb nom olgan yangi shtammni COVID-19’ni boshdan kechirgan kishilar qon plazmasida sinovdan o‘tkazib, u avvalgi kasallanishda hosil bo‘lgan neytrallashtiruvchi antitanalarga bardoshli ekanligini aniqladi.
“Dunyoda ko‘pchilik SARS-CoV-2 bilan kasallanib, ularda taxminan qanchadir darajada immunitet hosil bo‘lgan bo‘lsa-da, virusning yangi turi kasallanish qaytalanishida katta xavf tug‘diradi”, — deya Medical Xpress JAR olimlarining hali taqrizdan o‘tmagan ishidan iqtibos keltirgan.
Mutaxassislarning fikricha, bu COVID-19’ni davolashda kasallikdan sog‘ayib chiqqan bemorlar qon plazmalaridan foydalanish samaradorligining pasayishiga olib kelishi ham mumkin.
Vashingtondagi Fred Xatchinson nomidagi onkologik tadqiqot markazidan bo‘lgan Trevor Bedfordning fikricha, koronavirusning “afrikacha” shtammi yaqin oylarda keng tarqalishi mumkin. Uning aytishicha, agar Janubiy Afrika olimlarining xulosalari tasdiqlansa, COVID-19’ga qarshi vaksinalarni ishlab chiqarishda o‘zgartirishlar kiritish kerak bo‘ladi.
Avvalroq Janubiy Afrika olimlari koronavirusning yangi shtammi virusning avvalgi mutatsiyalariga nisbatan, taxminan, 50 foizga ko‘proq yuqumliligini aniqlagandi. JSST pandemiyaning ikkinchi yili “birinchisidan-da og‘irroq bo‘lishi mumkin”ligidan ogohlantirgandi.
Izoh (0)