Interpol Bayrut portida 2020-yil avgustida sodir bo‘lgan selitra portlashi haqidagi ish bo‘yicha tekshiruv yuzasidan ikki nafar Rossiya fuqarosiga nisbatan qidiruv e’lon qildi, deb yozadi Meduza.

Foto: “RIA Novosti”

Gap selitra yetkazib berilgan kema kapitani Boris Prokoshev hamda kemaning xo‘jayini Igor Grechushkin haqida bormoqda. Ular bilan birgalikda Gruziyadagi fabrikada ushbu selitrani sotib olgan portugaliyalik Xorxe Moreyra ham qidiruvga berildi.

Interpol bo‘yicha qidiruv Livan Bosh prokuraturasi so‘rovi bilan e’lon qilindi.

Rossiyaliklar va portugaliyalikka nisbatan “qizil bildirishnoma” berilgan. U hibs uchun xalqaro orderga nisbatan pastroq prioritetga ega: Interpolga a’zo mamlakatlar bu odamlarni qidirish bilan shug‘ullanishi shart emas, ammo ular joylashgan joy ma’lum bo‘lib qolsa, ularni ushlash kerak.

Prokoshev “RBK”ga ma’lum qilishicha, qidiruvga berilganidan “shokka tushgan”. “Axir biz yukni Livanga emas, Mozambikka olib ketayotgan edik. Ularning o‘zi kemani Bayrutda ushlab qolgani, uni portdan chiqarmaganiga men aybdor emasman”, — dedi dengizchi.

Grechushkin va Prokoshev 2020-yil oktabridayoq Livanda sirtdan hibsga olingan edi.

Livan poytaxti Bayrut shahridagi portda 2020-yilning 4-avgust kuni ammiak selitrasi saqlanayotgan ombor portlagandi. Portlash kuchi shu darajada bo‘ldiki, uning oqibatida butun shahardagi binolar zarar ko‘rdi, 190 kishi halok bo‘ldi, 300 mingdan ortiq odam uysiz qoldi.

Mamlakat rasmiylari portlash oqibatida yuzaga kelgan umumiy zararni 3-5 milliard dollarga baholadi. Hodisa sababli mamlakat hukumati iste’foga chiqdi. Portlashga olti yil avval bojxona xizmati tomonidan musodara qilingan va portdagi omborda saqlanayotgan 2750 tonna ammiak selitrasi sabab bo‘lgan.