Suriyadan “Mehr-3” operatsiyasi doirasida 25 nafar ayol va 73 nafar bola O‘zbekistonga qaytarilgani xabar berilgan edi. Ular qatorida Yulduz Usmonova ham voyaga yetmagan 5 nafar farzandi bilan olib kelindi. Bu haqda Sirdaryo viloyati hokimligi matbuot xizmati xabar berdi.

Foto: Sirdaryo viloyati hokimligi matbuot xizmati

“Mehr-3” dasturi doirasida O‘zbekiston hukumati tomonidan insonparvarlik operatsiyasi amalga oshirilib, diniy ekstremistik g‘oyalarga ishonib to‘g‘ri yo‘ldan adashgan fuqarolar Suriyaning jangovar harakatlari olib borilayotgan hududlaridan qaytarildi.

Ma’lum qilinishicha, 1990-yilda Sirdaryo viloyatida tug‘ilgan Yulduz Asqarovna Usmonova 2011-yil turmush o‘rtog‘i ortidan ishlash uchun jo‘nab ketadi. U yerda xalqaro terroristik tashkilotlarning yot g‘oyalari ta’siriga tushib qolib, 2012-yilning sentabr oyida 3 nafar farzandi bilan avval Eron, keyin Pokistonga va shundan so‘ng Suriyaga jo‘natiladi.

Suriyaning Shadodiy aholi punktida yashab yurgan paytida unga turmush o‘rtog‘i qurolli to‘qnashuvda o‘lgani aytiladi.

“Islom davlati” xalqaro terroristik tashkiloti jangarisi, asli o‘zbekistonlik boshqa bir davlatdan kelgan shaxsga turmushga chiqadi. 2015 va 2016-yillarda yana 2 nafar farzandi dunyoga keladi. 2020-yilning mart oyida u shar’iy nikohida bo‘lgan turmush o‘rtog‘i ham harbiy to‘qnashuvlar chog‘ida halok bo‘ladi.

Ma’lumot uchun, O‘zbekiston rahbariyati “Mehr” insonparvarlik operatsiyasini ilk bor 2019-yil may oyi oxirida amalga oshirgan, o‘shanda 156 nafar o‘zbekistonlik, asosan, ayollar va bolalar Uzbekistan Airways’ning Suriya poytaxti Damashqdan amalga oshirilgan maxsus reysi bilan O‘zbekistonga olib kelingan edi.

Keyinchalik ushbu operatsiya davomida O‘zbekiston tomoni ma’lum bir qiyinchiliklarga duch kelgani ayon bo‘lgan edi. Xususan, O‘zbekiston Prezidenti Shavkat Mirziyoyev bir davlat Suriyadan vatandoshlarni olib qaytish uchun O‘zbekiston samolyotini urib tushirish bilan tahdid qilganini ma’lum qilgan edi.

2019-yilning oktabr oyida esa Yaqin Sharqdagi mojarolar hududidan o‘zbekistonliklarni qaytarish bo‘yicha ikkinchi maxsus operatsiya amalga oshirilgan.