Суриядан «Меҳр-3» операцияси доирасида 25 нафар аёл ва 73 нафар бола Ўзбекистонга қайтарилгани хабар берилган эди. Улар қаторида Юлдуз Усмонова ҳам вояга етмаган 5 нафар фарзанди билан олиб келинди. Бу ҳақда Сирдарё вилояти ҳокимлиги матбуот хизмати хабар берди.
«Меҳр-3» дастури доирасида Ўзбекистон ҳукумати томонидан инсонпарварлик операцияси амалга оширилиб, диний экстремистик ғояларга ишониб тўғри йўлдан адашган фуқаролар Суриянинг жанговар ҳаракатлари олиб борилаётган ҳудудларидан қайтарилди.
Маълум қилинишича, 1990 йилда Сирдарё вилоятида туғилган Юлдуз Асқаровна Усмонова 2011 йил турмуш ўртоғи ортидан ишлаш учун жўнаб кетади. У ерда халқаро террористик ташкилотларнинг ёт ғоялари таъсирига тушиб қолиб, 2012 йилнинг сентябрь ойида 3 нафар фарзанди билан аввал Эрон, кейин Покистонга ва шундан сўнг Сурияга жўнатилади.
Суриянинг Шадодий аҳоли пунктида яшаб юрган пайтида унга турмуш ўртоғи қуролли тўқнашувда ўлгани айтилади.
«Ислом давлати» халқаро террористик ташкилоти жангариси, асли ўзбекистонлик бошқа бир давлатдан келган шахсга турмушга чиқади. 2015 ва 2016 йилларда яна 2 нафар фарзанди дунёга келади. 2020 йилнинг март ойида у шаръий никоҳида бўлган турмуш ўртоғи ҳам ҳарбий тўқнашувлар чоғида ҳалок бўлади.
Маълумот учун, Ўзбекистон раҳбарияти «Меҳр» инсонпарварлик операциясини илк бор 2019 йил май ойи охирида амалга оширган, ўшанда 156 нафар ўзбекистонлик, асосан, аёллар ва болалар Uzbekistan Airways’нинг Сурия пойтахти Дамашқдан амалга оширилган махсус рейси билан Ўзбекистонга олиб келинган эди.
Кейинчалик ушбу операция давомида Ўзбекистон томони маълум бир қийинчиликларга дуч келгани аён бўлган эди. Хусусан, Ўзбекистон Президенти Шавкат Мирзиёев бир давлат Суриядан ватандошларни олиб қайтиш учун Ўзбекистон самолётини уриб тушириш билан таҳдид қилганини маълум қилган эди.
2019 йилнинг октябрь ойида эса Яқин Шарқдаги можаролар ҳудудидан ўзбекистонликларни қайтариш бўйича иккинчи махсус операция амалга оширилган.
Изоҳ (0)