Sirdaryo viloyati Guliston shahrida profilaktika inspektoriga faol qarshilik ko‘rsatib, unga tan jarohati yetkazgan shaxslar qamoqqa olindi. Bu haqda viloyati IIB axborot xizmati xabar berdi.
Ma’lumotlarga ko‘ra, 29-noyabr kuni tungi soat 01:00 larda Guliston shahar IIO FMB 3-sonli IIB navbatchilik qismiga Guliston shahar “Bahor” mahallasi Toshkent yo‘li ko‘chasida joylashgan “Safina” nomli kafeda janjal bo‘layotganligi haqida xabar kelib tushgan.
Unga asosan, voqea joyiga yetib borgan ushbu mahalla profilaktika inspektori Guliston shahar IIO FMBda, ma’muriy nazoratda turuvchi, “Safina” kafesining ish yurituvchisi bo‘lib ishlovchi fuqaro D.S. hamda uch nafar notanish shaxs birgalikda spirtli ichimlik iste’mol qilib o‘tirganligini ko‘rgan. D.S.ning ma’muriy nazorat qoidalarini buzib, spirtli ichimlik iste’mol qilib o‘tirganligi sababli ular o‘tirgan joyni o‘zining telefon apparatida fotosuratga olib, holat yuzasidan tegishli hujjatlar rasmiylashtirish uchun ularni 3-sonli IIBga borishni taklif qilgan.
Shu vaqtda uning oldiga mast holatda bo‘lgan fuqaro K.L. hamda ma’muriy nazorat ostida bo‘lgan D.S. kelib, birgalikda xodimga nisbatan qo‘pol munosabatda bo‘lgan va ikkalasi birga profilaktika inspektorining bosh, yuz qismi va badanining turli joylariga urib-tepib, tan jarohati yetkazgan. Shuningdek, inspektorning telefon apparatini olib, yerga urib sindirib, yaroqsiz holatga keltirgan.
Mazkur holat yuzasidan Guliston shahar prokuraturasi tomonidan fuqarolar K.L. va D.S.ga nisbatan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 2-qismi bilan jinoyat ishi qo‘zg‘atilib, ehtiyot chorasi sifatida Jinoyat-protsessual kodeksining 221-moddasi tartibida qamoqqa olingan.
Hozirda holat yuzasidan tergov harakatlari olib borilmoqda.
Avvalroq Toshkentda YPX xodimini kaltaklagan ikki sudya lavozimidan olingani, ularning sherigiga hayfsan berilgani, Samarqandda xizmat o‘tayotgan 31 yoshli IIB profilaktika inspektori Damas urib ketishi oqibatida vafot etgani hamda Oqqo‘rg‘onda YPX xodimining pogonini va kamerasini yulib olgan 3 yo‘lovchi 15 sutkaga qamalgani haqida xabar berilgandi.
Izoh (0)