Italiyaning Komo shahrida istiqomat qiluvchi erkak xotini bilan urishib qolganidan so‘ng sayrga chiqib ketib, uyidan 450 kilometr uzoqqa borib qoldi, deb xabar beradi Wanted in Milan.
Foto: Pikist
Ta’kidlanishicha, erkak kechasi soat 02:00 larda maqsadsiz tentirab yurib, komendantlik soatini buzgani uchun Fano shahrida qo‘lga olingan.
48 yoshli “qochoq”ning so‘zlariga ko‘ra, u bosib o‘tilgan masofa qanchaga yetgani haqida tasavvurga ham ega bo‘lmagan, yeguliklarni esa yo‘lida uchragan odamlardan so‘rab ketavergan.
Huquq-tartibot organi xodimlarining aniqlashicha, bir hafta oldin er-xotin o‘rtasida mojaro yuzaga kelgan bo‘lib, erkak tinchlanish uchun ko‘chaga chiqib ketgan va yo‘qolib qolgan. Uning rafiqasi eri yo‘qolib qolgani to‘g‘risida ariza bergan.
Fanoda horg‘in erkak mehmonxonaga olib borilgan, ertasi kuni esa rafiqasi kelib uni olib ketgan.
Nashrning yozishicha, “qochoq” mehmonxonada yashagani va karantin qoidalarini buzgani uchun 400 yevro jarima to‘lashi kerak. Ijtimoiy tarmoq foydalanuvchilari erkakni “italiyalik Forest Gamp” deb atamoqda.
