Toshkent tibbiyot akademiyasi Farg‘ona filiali negizida Farg‘ona jamoat salomatligi tibbiyot instituti tashkil etiladi. Prezident Shavkat Mirziyoyev 3-dekabr, payshanba kuni bu boradagi tegishli qarorni imzoladi, deb xabar beradi O‘zA. Farg‘ona viloyati yuqumli kasalliklar shifoxonasi institutning klinik bazasi etib belgilangan.

Foto: “ttaff.uz”

Shuningdek, hujjatda qayd etilishicha, qaror sog‘liqni saqlash, sanitariya-epidemiologik osoyishtalik va jamoat salomatligi sohasida yuqori malakaga ega oliy ma’lumotli kadrlarni tayyorlash, xodimlarni kasbiy rivojlantirish tizimini yanada takomillashtirish hamda tibbiyot tashkilotlari, shu jumladan, birlamchi tibbiy-sanitariya yordami muassasalarini professional mutaxassislar bilan ta’minlash maqsadida qabul qilingan.

Institut sog‘liqni saqlash hamda sanitariya-epidemiologik osoyishtalik va jamoat salomatligi muassasalari uchun tor sohadagi mutaxassisliklar bo‘yicha shifokorlarni tayyorlash bilan shug‘ullanadi.

Shuningdek, kadrlar yetakchi xorijiy tibbiyot oliy ta’lim muassasalari bilan hamkorlikda malakali mutaxassislarga ehtiyoj yuqori bo‘lgan sohalar uchun qo‘shma ta’lim va akademik mobillik dasturlari asosida amalga oshiriladi.

Avvalroq 2021/2022-o‘quv yilidan boshlab mavjud ehtiyojdan kelib chiqib Qarshi davlat universiteti, Jizzax davlat pedagogika instituti, Navoiy davlat pedagogika instituti, Guliston davlat universitetida tibbiyot fakultetlari tashkil qilinishi to‘g‘risida xabar berilgandi.