“19 yil qamoq jazosini o‘tab chiqdim, yashash uyim noqonuniy tarzda sotib yuborilgan”. Toshkent shahrida sayyor qabul bo‘lib o‘tdi

Fuqarolar murojaatlari va masalalarini joyiga borib, ijobiy hal qilish maqsadida 30-noyabr kuni Toshkent shahri Mirobod tumanida sayyor qabul bo‘lib o‘tdi. Unda Ichki ishlar vazirligi, Toshkent shahar prokuraturasi, Sog‘liqni saqlash vazirligi, Adliya vazirligi va boshqa bir qator tashkilot va idora mutasaddilari murojaatchilar masalalarini o‘rgandi.

Murojaatlarning aksariyati uy-joy qurish uchun yer ajratish, moddiy yordam, pensiya, bolalar nafaqasi, ishga joylashish, bank-moliya, soliqqa tortish, tabiiy gaz, elektr energiyasi, ichimlik suvi ta’minotidagi uzilishlar, sog‘liqni saqlash, kommunal xo‘jalik, yo‘llarni ta’mirlash, ta’lim sohasidagi muammolar, tadbirkorlikni rivojlantirish yuzasidan bo‘ldi.

“Men 2001-yilda bosqinchilik jinoyati bilan qamoq jazosiga hukm qilinganman. Shundan keyin 19 yil o‘tib qamoqdan chiqdim. Ozodlikka chiqsam, avvalgi yashash uyim noqonuniy tarzda sotib yuborilgan. Bu bo‘yicha Toshkent shahar Olmazor tumani prokuraturasiga murojaat qildim va uyimni qaytarib oldim. Endi hayotimni boshidan boshlab quraman. Haligacha uylanmaganman, yaqinda turmush qurib, bola-chaqa ko‘rishni xohlayman. Bu yerga mutasaddilardan ish so‘rab keldim”, — dedi Toshkent shahar prokuraturasining qabuliga murojaat qilib kelgan fuqaro.

Sayyor qabulda huquqni muhofaza qiluvchi organlar bilan birgalikda Sog‘liqni saqlash vazirligi, Mahalla va oilani qo‘llab-quvvatlash vazirligi va ta’lim tizimi tashkilotlari kabi idora rahbarlari ham qatnashdi.

Murojaatlarning aksariyati sog‘liqni saqlash tizimi bo‘yicha bo‘ldi. Pandemiya sharoitida dori-darmon hamda boshqa tibbiy texnik vositalarga talab ortgani sababli sotib olishga qurbi yetmaydigan ayrim fuqarolar yordam so‘rab murojaat qildi.

Bundan tashqari, bolalar uyida tarbiyalangan fuqaro K.V. o‘z murojaatida Toshkent shahar, Olmazor tumanidagi xonadonlarning biridan oldi-sotdi sharnomasini qonuniyligi hamda unga doimiy yashashi uchun davlat tomonidan xonadon ajratilishida amaliy yordam so‘radi. Mazkur murojaat tuman prokuraturasi tomonidan o‘rganib chiqilib, Olmazor tumani, Minor ko‘chasida joylashgan 2-sonli yotoqxonaning 43-sonli xonadoni ajratildi.

Sudlov hay’ati tashkil qilinib, qabulda uzoq muddatdan beri cho‘zilib kelayotgan sud ishlari bo‘yicha murojaat qilgan fuqarolar  masalalari o‘rganildi. Fuqarolarga murojaatning mazmuni bo‘yicha kerakli maslahatlar berildi.

Sayyor qabulda tashkilot rahbarlari va fuqarolar joyida hal etilmagan masalalar bo‘yicha keyingi kuni idora binosida o‘rganib chiqishga kelishib oldi.