Qozog‘iston va O‘zbekiston o‘rtasida 20-noyabr kuni eTIR (electronic TIR) protsedurasidan foydalangan holda birinchi yuk tashish ishlari amalga oshirildi. Bu haqda Xalqaro avtomobil transporti ittifoqi (IRU)ga tayanib, “Gazeta.uz” xabar berdi.
Maishiy elektrotexnika vositalari ortilgan yuk mashinalari Toshkentdan chiqib, Qozog‘iston chegarasini kesib o‘tgan, ikkala tomonning bojxona organlari esa tranzit kafolatlarini muvaffaqiyatli qayta ishlagan.
Ushbu yuklarni tashish protseduralari IRU va Germaniya xalqaro hamkorlik jamiyati (GIZ) rahbariyati, shuningdek, IRU’ning O‘zbekiston va Qozog‘istondagi bojxona organlari hamda a’zolari — O‘zbekiston yuk tashuvlarining xalqaro avtomobil assotsiatsiyasi (AIRCUZ) va Qozog‘iston yuk tashuvlarining xalqaro avtomobil ittifoqi (KazATO) tomonidan qo‘llab-quvvatlangan savdo jarayonlarini soddalashtirish bo‘yicha mintaqaviy loyihasining muhim tarmog‘iga aylandi.
TIR (Transports Internetional Routiers — Xalqaro yo‘llarda tashish) — 1975-yilda yaratilgan xalqaro yo‘llarda tashish kitobchasini qo‘llagan holda yuklarni xalqaro tashish to‘g‘risidagi bojxona konvensiyasi asosida ishlaydigan yuklarni xalqaro yo‘llarda tashish tizimi. Ayni vaqtda XYTni to‘liq raqamli protseduraga o‘tazish ishlari amalga oshirilmoqda.
“Avtomobillarda yuklarni tashishni soddalashtirish maqsadida raqamlashtirish, ayniqsa, dengizga chiqa olmaydigan Markaziy Osiyo davlatlari uchun juda muhim, chunki u dengiz portlari va jahon bozorlariga chiqishni yaxshilash uchun quruqlik yo‘llarini rivojlantirish imkonini beradi”, — deyiladi IRU xabarida.
eTIR’ning ko‘plab protseduralari masofadan turib bajariladi, unda Xalqaro yo‘llarda tashish assotsiatsiyasining mahalliy ofislariga borish talab etilmaydi.
Mavzuga doir: “Xorgos”ning O‘zbekiston—Qozog‘iston chegarasidagi muqobili “G‘ishtko‘prik” posti yaqinida quriladi
Izoh (0)