Argentinalik afsonaviy futbolchi Diyego Maradona 25-noyabr kuni 60 yoshida vafot etdi.

Futbol va sport olamidagi ko‘plab mashhurlar argentinalik dahoning o‘limiga o‘z munosabatini bildirmoqda. “Daryo” ularning ayrimlarini bir sahifaga to‘pladi.

Foto: Twitter

“Bugun do‘stim bilan xayrlashaman, dunyo esa — daho bilan. Tengi yo‘q sehrgar. U bizni juda erta tark etdi va o‘zidan hech kim to‘ldira olmaydigan bo‘shliq qoldirdi”.

Krishtianu Ronaldu, “Yuventus” futbolchisi

“Hamma bizdan so‘z kutmoqda. Biroq biz boshdan o‘tkazayotgan og‘riqni qanday so‘z bilan ifodalash mumkin? Hozir ko‘z yosh to‘kish vaqti. Keyin esa so‘zga navbat keladi”.

“Napoli” klubi

“U mening davrimda katta ustunlik bilan boshqalardan ajralib turardi. Balki, futbol tarixidagi eng buyuk o‘yinchidir. Baxtli, biroq behalovat hayotdan keyin umid qilamanki, u xudoning qo‘lida xotirjam tortadi”.

Gari Lineker, sobiq futbolchi

Foto: Instagram

“Bu barcha argentinaliklar va futbol uchun qayg‘uli kun. U ketdi, biroq u biz bilan, chunki Diyego abadiy.

Men u bilan birga o‘tkazgan har bir onni butun umr yodimda saqlab qolaman. Uning oilasi va do‘stlariga hamdardlik bildiraman. Alvido”.

Leo Messi, “Barselona” futbolchisi

“Futbol xudosi bizni tark etdi. Diyego, hammasi uchun rahmat”

Andrea Pirlo, “Yuventus” bosh murabbiyi

“Maradona futbol olamidagi so‘nggi uch o‘n yillikda o‘zining muhim izini qoldirdi. Endi xudo uni uyiga chaqirdi. Oxirating obod bo‘lsin, Diyego. Hammasi uchun rahmat.

Yozef Blatter, FIFA sobiq prezidenti

“Argentinalik bo‘lish baxti hech qanday qiymatga sotilmaydi”. Maradonaning 100 mln dollarga sotilmagan vatanparvarligi haqida

“Xayolga kelgan birinchi o‘y Agueroni ovutish bo‘ldi, axir Maradona uning o‘g‘liga bobo bo‘ladi. Futbol tarixida aqlbovar qilmas futbolchilar ko‘p emas va u ular sirasiga kiradi. Butun klub nomidan uning oilasiga hamdardlik bildiraman”.

Pep Gvardiola, “Manchester Siti” bosh murabbiyi

Foto: Twitter

“Maradona, ‘Xudoning qo‘li’ bizni tark etdi. 1986-yilda ikkimiz ham chempionga aylangandik. Bizni o‘zaro solishtirishgandi. U mening qahramonlarimdan biri edi, do‘stim edi”.

Mayk Tayson, sobiq bokschi

“Bu juda og‘ir. Senga qo‘ng‘iroq qilishadi va Maradona o‘lganini aytishadi. Sen esa bunga ishona olmaysan. U Argentina uchun juda muhim shaxs. U juda kuchli, hamma vaqtda g‘alaba qozongan, biroq bu hodisani yenga olmadi”.

Diyego Simeone, “Atletiko” bosh murabbiyi

“Barcha davrlarning eng buyuk sportchilaridan biri. Millionlab odamlar uni deb futbolni yaxshi ko‘radi”.

Habib Nurmagomedov, UFC jangchisi

Mavzuga doir: Maradonaning neapollik bemor bolaga yordam berish uchun klubga qarshi chiqib, loy maydonda o‘ynab gol urgani haqida kichik hikoya

“U 1986-yilda aqlbovar qilmas darajada edi, uni ushlab qolishning iloji yo‘q edi. O‘sha vaqtda u qanday o‘yinchi ekanini tushunib yetganman. O‘yinlarni yolg‘iz o‘zi yutardi, qolganlardan ancha ustun edi. Uning o‘limi futbol uchun katta yo‘qotish. Bu katta tragediya”.

Zinedin Zidan, “Real” bosh murabbiyi

Mening do‘stim, mening kumirim, mening o‘ninchi raqamim. Xoh u o‘yin bo‘lsin, xoh tushlik, birgalikda o‘tkazgan har bir onimiz uchun tashakkur.  Alvido, mening kumirim, seni yaxshi ko‘raman... Sehrgarlar sehrgari!”.

Ronaldinyo, sobiq futbolchi

“U kishilarni o‘zi bilan faxrlanishga majbur qilardi. Albatta, uning ojiz tomonlarini hech kim inkor etmaydi, biroq siz uning kelib chiqishini yaxshi bilasiz. Afsona oldida shlyapamni yechishga tayyorman”.

Guss Hiddink, futbol murabbiyi

Foto: Getty Images

“Juda og‘ir kun. O‘zimizning Diyego bizni tark etdi. Sukut, ko‘z yosh, og‘riq — bu hozirda biz his qilayotgan kechinmalar.

Diyego bizning abadiy minnatdorchiligimizga loyiq. U futbol tarixidagi ertaklarda barcha ko‘rib turadigan joydan o‘rin oladi”.

Janni Infantino, FIFA prezidenti

“Diyego mening kumirim edi, uning o‘yinidan ilhomlanar edim. Futbolda u buyuk shaxs. U o‘yinchi sifatida shunday shedevrlar ijro etgandi-ki, uni na Messi, na Ronaldu, na Pele qaytara oladi.

Shubhasiz, 60 yosh — bu juda erta. Biroq u o‘zining turmush tarzi nimalarga olib borishini yaxshi bilardi. Shunga qaramay uni barcha buyuk futbolchi va samimiy inson sifatida xotirlaydi”.

Andrey Kanchelskis, “Navbahor” sobiq bosh murabbiyi

“Diyego Maradonaning o‘limidan chuqur qayg‘udaman. U Janubiy Amerikada qahramon edi. Shuningdek, “Napoli” ishqibozlarining kumiriga aylangan, ular buni umrbod unutmaydi. Maradona istalgan yosh toifasidagi muxlisni lol qoldirgan futbolchi sifatida tarixga kiradi”.

Aleksander Cheferin, UEFA prezidenti

“Bu yerda so‘z ortiqcha. U men hozirgacha ko‘rgan futbolchilar ichida eng yaxshisi. Afsuski, Pele qanday o‘ynaganini ko‘rmaganman. Maradonaning o‘limi — bu futbol va sport uchun tragediya”.

Valeriy Karpin, “Rostov” bosh murabbiyi

Foto: Twitter

“Uning ketganidan qayg‘udaman, ammo u bilan uchrashtirgani uchun bu hayotdan mamnunman. Sening merosing abadiy qoladi, sehring hech qachon unutilmaydi”

Ronaldo, sobiq futbolchi

“Futbolning ikki qirolidan biri vafot etdi. Qushning ikki qanoti bo‘ladi. Uning bitta qanoti ketdi va endi bitta qanoti bilan uchishga harakat qiladi”.

Xayrulla Hamidov, jurnalist, futbol sharhlovchisi

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!