Аргентиналик афсонавий футболчи Диего Марадона 25 ноябрь куни 60 ёшида вафот этди.
Футбол ва спорт оламидаги кўплаб машҳурлар аргентиналик даҳонинг ўлимига ўз муносабатини билдирмоқда. «Дарё» уларнинг айримларини бир саҳифага тўплади.
«Бугун дўстим билан хайрлашаман, дунё эса — даҳо билан. Тенги йўқ сеҳргар. У бизни жуда эрта тарк этди ва ўзидан ҳеч ким тўлдира олмайдиган бўшлиқ қолдирди».
Криштиану Роналду, «Ювентус» футболчиси
«Ҳамма биздан сўз кутмоқда. Бироқ биз бошдан ўтказаётган оғриқни қандай сўз билан ифодалаш мумкин? Ҳозир кўз ёш тўкиш вақти. Кейин эса сўзга навбат келади».
«Наполи» клуби
«У менинг давримда катта устунлик билан бошқалардан ажралиб турарди. Балки, футбол тарихидаги энг буюк ўйинчидир. Бахтли, бироқ беҳаловат ҳаётдан кейин умид қиламанки, у худонинг қўлида хотиржам тортади».
Гари Линекер, собиқ футболчи
«Бу барча аргентиналиклар ва футбол учун қайғули кун. У кетди, бироқ у биз билан, чунки Диего абадий.
Мен у билан бирга ўтказган ҳар бир онни бутун умр ёдимда сақлаб қоламан. Унинг оиласи ва дўстларига ҳамдардлик билдираман. Алвидо».
Лео Месси, «Барселона» футболчиси
«Футбол худоси бизни тарк этди. Диего, ҳаммаси учун раҳмат»
Андреа Пирло, «Ювентус» бош мураббийи
«Марадона футбол оламидаги сўнгги уч ўн йилликда ўзининг муҳим изини қолдирди. Энди худо уни уйига чақирди. Охиратинг обод бўлсин, Диего. Ҳаммаси учун раҳмат.
Ёзеф Блаттер, ФИФА собиқ президенти
«Хаёлга келган биринчи ўй Агуэрони овутиш бўлди, ахир Марадона унинг ўғлига бобо бўлади. Футбол тарихида ақл бовар қилмас футболчилар кўп эмас ва у улар сирасига киради. Бутун клуб номидан унинг оиласига ҳамдардлик билдираман».
Пеп Гвардиола, «Манчестер Сити» бош мураббийи
«Марадона, ‘Худонинг қўли’ бизни тарк этди. 1986 йилда иккимиз ҳам чемпионга айлангандик. Бизни ўзаро солиштиришганди. У менинг қаҳрамонларимдан бири эди, дўстим эди».
Майк Тайсон, собиқ боксчи
«Бу жуда оғир. Сенга қўнғироқ қилишади ва Марадона ўлганини айтишади. Сен эса бунга ишона олмайсан. У Аргентина учун жуда муҳим шахс. У жуда кучли, ҳамма вақтда ғалаба қозонган, бироқ бу ҳодисани енга олмади».
Диего Симеоне, «Атлетико» бош мураббийи
«Барча даврларнинг энг буюк спортчиларидан бири. Миллионлаб одамлар уни деб футболни яхши кўради».
Ҳабиб Нурмагомедов, UFC жангчиси
Мавзуга доир: Марадонанинг неаполлик бемор болага ёрдам бериш учун клубга қарши чиқиб, лой майдонда ўйнаб гол ургани ҳақида кичик ҳикоя
«У 1986 йилда ақл бовар қилмас даражада эди, уни ушлаб қолишнинг иложи йўқ эди. Ўша вақтда у қандай ўйинчи эканини тушуниб етганман. Ўйинларни ёлғиз ўзи ютарди, қолганлардан анча устун эди. Унинг ўлими футбол учун катта йўқотиш. Бу катта трагедия».
Зинедин Зидан, «Реал» бош мураббийи
Менинг дўстим, менинг кумирим, менинг ўнинчи рақамим. Хоҳ у ўйин бўлсин, хоҳ тушлик, биргаликда ўтказган ҳар бир онимиз учун ташаккур. Алвидо, менинг кумирим, сени яхши кўраман... Сеҳргарлар сеҳргари!».
Роналдиньо, собиқ футболчи
«У кишиларни ўзи билан фахрланишга мажбур қиларди. Албатта, унинг ожиз томонларини ҳеч ким инкор этмайди, бироқ сиз унинг келиб чиқишини яхши биласиз. Афсона олдида шляпамни ечишга тайёрман».
Гусс Ҳиддинк, футбол мураббийи
«Жуда оғир кун. Ўзимизнинг Диего бизни тарк этди. Сукут, кўз ёш, оғриқ — бу ҳозирда биз ҳис қилаётган кечинмалар.
Диего бизнинг абадий миннатдорчилигимизга лойиқ. У футбол тарихидаги эртакларда барча кўриб турадиган жойдан ўрин олади».
Жанни Инфантино, ФИФА президенти
«Диего менинг кумирим эди, унинг ўйинидан илҳомланар эдим. Футболда у буюк шахс. У ўйинчи сифатида шундай шедеврлар ижро этганди-ки, уни на Месси, на Роналду, на Пеле қайтара олади.
Шубҳасиз, 60 ёш — бу жуда эрта. Бироқ у ўзининг турмуш тарзи нималарга олиб боришини яхши биларди. Шунга қарамай уни барча буюк футболчи ва самимий инсон сифатида хотирлайди».
Андрей Канчельскис, «Навбаҳор» собиқ бош мураббийи
«Диего Марадонанинг ўлимидан чуқур қайғудаман. У Жанубий Америкада қаҳрамон эди. Шунингдек, «Наполи» ишқибозларининг кумирига айланган, улар буни умрбод унутмайди. Марадона исталган ёш тоифасидаги мухлисни лол қолдирган футболчи сифатида тарихга киради».Александер Чеферин, УЕФА президенти
«Бу ерда сўз ортиқча. У мен ҳозиргача кўрган футболчилар ичида энг яхшиси. Афсуски, Пеле қандай ўйнаганини кўрмаганман. Марадонанинг ўлими — бу футбол ва спорт учун трагедия».
Валерий Карпин, «Ростов» бош мураббийи
«Унинг кетганидан қайғудаман, аммо у билан учраштиргани учун бу ҳаётдан мамнунман. Сенинг меросинг абадий қолади, сеҳринг ҳеч қачон унутилмайди»
Роналдо, собиқ футболчи
«Футболнинг икки қиролидан бири вафот этди. Қушнинг икки қаноти бўлади. Унинг битта қаноти кетди ва энди битта қаноти билан учишга ҳаракат қилади».
Хайрулла Ҳамидов, журналист, футбол шарҳловчиси
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)