Toshkentda Kinochilar uyi qayta tiklanadi
Shavkat Mirziyoyevning kinoarboblar bilan O‘zbekfilm kinostudiyasi binosida o‘tkazgan uchrashuvi davomida Tashkent City qurilishidan avval buzib tashlangan Kinochilar uyi binosi qayta tiklanishi, kinochilar uchun yangi uylar qurilishi, kinoakademiya tashkil qilinishi va uning binosi qurilishi rejalashtirilgani ma’lum qilindi. Bu haqda “O‘zbekiston 24” telekanalida efirga berilgan reportajda qayd etilgan.
Reportajda rejissor Hamidulla Hasanov O‘zbekfilm studiyasi tanib bo‘lmas darajada o‘zgarib ketgani, zamonaviy texnikalar, dekoratsiyalar olib kelinganidan xursandligini bildirgan.
Boshqa bir rejissor Bahodir Odilov ham uchrashuvdan olgan taassurotlari haqida gapirib, kinochilarning kayfiyati ko‘tarinki ekanligini ta’kidlagan.
“Studiya yonidagi maydonda Kinochilar uyining qurilishi boshlanadi. Undan tashqari, “O‘zbekfilm” hududida kinochilar uchun yangi uylar hamda uchinchi katta sovg‘a – rejissorlar, ssenariynavislar, operatorlarni tayyorlovchi maxsus kinoakademiya tashkil qilinadi. 20-noyabrni O‘zbek kinosining qayta tug‘ilgan kuni deb atasa bo‘ladi, deb o‘ylayman. Uch yil ichida kino juda ham o‘zgarib ketdi, yang-yangi filmlar ishlandi”, – deya uchrashuvdagi taassurotlari haqida gapirgan Bahodir Odilov.
Kinochilar uyining yangi binosi “O‘zbekfilm” studiyasi yonida, Chilonzor ko‘chasida yangidan barpo etiladi.
1982-yilda Toshkentdagi Osiyo, Afrika va Lotin Amerikasi mamlakatlari kinofestivali munosabati bilan foydalanishga topshirilgan Kinochilar uyi binosini buzish ishlari 2017-yil oxirida boshlangan, o‘shanda bino me’mori Rafael Xayrutdinovning rafiqasi Firuza Xayrutdinova buzib tashlanayotgan bino bilan xayrlashishga kelgandi. 2018-yil yanvar oyida Kinochilar uyi to‘liq buzib tashlangan.
Ayni vaqtda sobiq bino o‘rnida Tashkent City majmuasining Hilton mehmonxonasi bunyod etilgan va 2019-yil oktabr oyida foydalanishga topshirilgan. 21 qavatli binoda 258 ta nomer mavjud — 8 tasi davlat rahbarlari uchun mo‘ljallangan. Otelda bir nechta restoran, basseyn, sport zal, spa va boshqa salonlar bor.
Kinochilar uyining qayta tiklanishi haqida ilk bor 2019-yil dekabr oyida xabarlar tarqalgan, “O‘zbekfilm” studiyasi yonidagi “Zamin” restorani o‘rnida qurilishi taxmin qilingandi. Shuningdek, 2019-yil 26-dekabrda Toshkentda o‘tkazilgan “Milliy kinematografiya: rivojlanish istiqbollari va ustuvor vazifalar” Respublika kino forumida Kinochilar uyini qayta tiklash, Toshkent xalqaro kinofestivalini o‘tkazish, Kinematografiya institutini tashkil qilish, “O‘zbekfilm” turistik markazini ochish, milliy seriallar studiyasini yaratish singari bir qator masalalar muhokama etilgan.
