2017-yilda Apple akkumulyatorlarning yeyilishini kompensatsiya qilish maqsadida dasturiy ta’minot darajasida ataylab uning samaradorligini pasaytirayotgani ma’lum bo‘lgandi. Buning natijasida katta mojaro yuzaga kelgan bo‘lib, u sud da’volari va shikoyatlari bilan yakunlangan.
Foto: Hi-Tech.Mail.ru
Vaziyatga oid surishtiruvga AQShning 34 ta shtati qo‘shilgan, bosh prokurorlar sudlar orqali kompaniyadan jarima to‘lashni talab qila boshlagan. The Washington Post’ning yozishicha, aftidan, oradan uch yil o‘tgach, sud ishi oxiriga yetmoqda — Apple masalani hal etish uchun 113 million dollar to‘lashga tayyor bo‘lgan.
Bu Apple’ning samaradorlik va akkumulyatorlarga bog‘liq ikkinchi yirik to‘lovi hisoblanadi. 2020-yil boshida kompaniya jamoaviy da’vo uchun 500 million dollar ajratgandi. Ishtirokchilarning aksariyati 25 dollardan va faqat AQShdagilar olgan. Kompaniya so‘nggi uch yil ichida turli jarimalar uchun jami 800 million dollarga yaqin mablag‘ sarflab yuborgan.
Apple 2017-yilning dekabrida rostan ham smartfonlarning ishlash samaradorligini pasaytirayotganini tan olgan — aks holda akkumulyatorlari yeyilgan modellar to‘satdan o‘chib qolishi mumkin.
Oxir-oqibat Apple foydalanuvchilarni ogohlantirmagani uchun kechirim so‘ragan va akkumulyatorlarni almashtirish bo‘yicha dasturni ishga tushirib, uning narxini 29 dollar etib belgilagan. Kompaniya iOS 11.3 versiyasida foydalanuvchilar o‘z batareyalarining holatini ko‘rishga imkon beradigan, shuningdek, ishchanlik qobiliyatini pasaytirish funksiyasini o‘chirib qo‘yadigan yangilikni taqdim etgan. 2018-yilda kompaniya sozlamalar orqali akkumulyator sig‘imining real holatini kuzatish imkoniyatini qo‘shgan.
