O‘zbekiston aholisi o‘tgan 10 oy ichida banklarga 3,7 mlrd dollar valyuta sotdi

O‘zbekistonda 2020-yilning yanvar—oktabr oylarida jismoniy shaxslar tomonidan banklarga sotilgan chet el valyutasi miqdori 3,7 milliard AQSh dollarini tashkil etib, avvalgi yilning mos davriga nisbatan 25 foizga yoki 744 million dollarga oshdi. Bu haqda Markaziy bank axborot xizmati xabar berdi.

Ma’lumotlarga ko‘ra, jismoniy shaxslar tomonidan banklarda sotib olingan valyuta hajmi esa 3,3 milliard dollarga teng bo‘lib, ushbu ko‘rsatkich o‘tgan yilning mos davriga nisbatan 2,7 barobar oshgan (2019-yilning mos davrida — 1,2 milliard dollar).

Bunda ushbu mablag‘larning 79 foizi aholi tomonidan valyuta ayirboshlash shoxobchalari orqali naqd ko‘rinishda hamda 21 foizi yoki 687 million dollar muqobil tartibda (onlayn konversiya, avtomatlashtirilgan ayirboshlash bankomatlari va hokazo) xarid qilingan.

“Ushbu operatsiyalar bo‘yicha ijobiy saldo (sof taklif) 350 million dollarga yetdi”, — deyiladi xabarda.

Eslatib o‘tamiz, 2019-yilda jismoniy shaxslar tomonidan valyuta ayirboshlash shoxobchalari orqali sotilgan chet el valyutasi miqdori 3,8 milliard dollarni tashkil etgan.