Maktabgacha ta’lim vaziri Agrippina Shin va Xitoyning O‘zbekistondagi favqulodda va muxtor elchisi Szyan Yan o‘rtasida 2020-yilning 5-noyabr kuni onlayn uchrashuv bo‘lib o‘tdi, deya xabar qilmoqda vazirlik axborot xizmati.
Uchrashuv davomida kelajakdagi hamkorlikning dolzarb masalalari muhokama qilindi. O‘zbekiston hududida o‘yinchoqlar va turli xil o‘yin uskunalarini hamda didaktik materiallarni ishlab chiqarishni yo‘lga qo‘yish maqsadida investitsiyalarni jalb etish, shuningdek, davlat-xususiy sherikligi asosida nodavlat maktabgacha ta’lim tashkilotlarini tashkil etish taklifi ilgari surildi.
Shu bilan birga, suhbatdan davlat maktabgacha ta’lim tashkilotlarida xitoy tilini qo‘shimcha chet tili sifatida o‘rganish, bu borada xodimlar malakasini oshirish kabi masalalar ham o‘rin oldi.
Qayd etilishicha, maktabgacha ta’lim vaziri Agrippina Shin va Xitoy elchisi Szyan Yan Toshkent shahrida raqamli bolalar bog‘chasining pilot loyihasini ishga tushirishni ham muhokama qildi.
Shuningdek, Xitoyning “Sun Sinlin” jamg‘armasi hamkorligi doirasida ixtisoslashtirilgan MTTlarda ta’lim sifatini oshirish, xodimlarning bilim salohiyatlarini kengaytirish masalalari borasida fikr almashildi.
Hamkorlik doirasida Xitoyda “Bolalarning erta rivojlanishi uchun innovatsion yondashuv” nomli Ikkinchi o‘zbek-xitoy forumini tashkil etish kelishib olindi.
Xitoyning O‘zbekistondagi elchixonasi nomidan kam ta’minlangan oilalar farzandlariga 300 dona o‘yinchoq sovg‘a qilindi.
Avvalroq Toshkentda bolani o‘zbek tilidagi maktablarga o‘qishga berish ulushi 55,5 foizga yetgani, Maktabgacha ta’lim vazirligi ko‘mirdan tappi tayyorlayotgan bog‘cha tarbiyachilari haqidagi xabarga munosabat bildirgani hamda Navoiyda 4 mlrd so‘mga qurilgan bolalar bog‘chasi 8 oy o‘tib ta’mirtalab ahvolga kelgani haqida xabar berilgandi.
Izoh (0)