Buyrak kasalliklari koronavirus infeksiyasidan vafot etish xavfini ikki martadan ko‘proq oshiradi. Bu haqda Buyuk Britaniya olimlarining Anaesthesia jurnalida e’lon qilingan tadqiqotlari natijalarida aytiladi, deb yozadi “RBK”.

Foto: “RIA Novosti”

Mutaxassislar 10-martdan 23-iyungacha bo‘lgan vaqt oralig‘ida London va Birmingemdagi to‘rtta kasalxona reanimatsiya bo‘limlariga COVID-19 bilan yotqizilgan 372 nafar bemorga oid ma’lumotlarni o‘rganib chiqdi.

216 nafar bemorda surunkali yoki infeksiya oqibatida kelib chiqqan muammolar bo‘lgan. Ulardan 107 kishi (50 foizi) vafot etgan. Buyragida muammo bo‘lmagan qolgan 156 bemordan esa 32 nafari (21 foizi) vafot etgan.

Tadqiqotchilar taxmin qilishicha, o‘limga olib kelish ehtimoli virusning organizmga umumiy ta’siriga, infeksiyani davolashda zaharli vositalardan foydalanishga, shuningdek, o‘pka va buyrak o‘rtasidagi bir yo‘la bir nechta tomondan bog‘liqlikka aloqador.

Avvalroq Liverpul universiteti olimlari gripp va koronavirus bilan ketma-ket kasallanish ham o‘limga olib kelish xavfini oshirishini aytgan edi.

Eslatib o‘tamiz, dunyo bo‘yicha koronavirus infeksiyasi asoratlari oqibatida vafot etganlar soni 1,1 million kishidan oshdi.

Avvalroq Jahon sog‘liqni saqlash tashkiloti (JSST) rahbari Tedros Gebreyesus deksametazon – COVID-19’ga qarshi kurashda samarali ekani isbotlangan yagona dori vositasi ekanligini ma’lum qilgan edi.