Buxoro viloyatining Jondor tumanida otasining qoramolini o‘g‘irlagan 30 yoshli fuqaro Anvar (barcha ismlar o‘zgartirilgan) va uning jinoiy sherigi 27 yoshli Sobir qo‘lga olingan. Bu haqda “Daryo”ga Buxoro viloyati IIB axborot xizmati ma’lum qildi.
Ta’kidlanishicha, Jondor tumani “Samonchuq” MFYda istiqomat qiluvchi fuqaro Qodir Saidov bozor bahosi 3 million 500 ming so‘m bo‘lgan bir bosh qoramoli o‘g‘irlanganini bo‘yicha Jondor tumani Ichki ishlar bo‘limiga murojaat qilgan.
Holat yuzasidan tuman IIB huzuridagi tergov bo‘linmasi tomonidan Jinoyat kodeksining 169-moddasi 2-qismi (o‘g‘rilik) bilan jinoyat ishi qo‘zg‘atilib, tergov harakatlari olib borilgan.
“Tuman ichki ishlar bo‘limining tezkor xodimlari va hududiy profilaktika inspektori hamkorligida olib borilgan tezkor-surishtiruv va tergovga qadar tekshiruv harakatlari davomida ushbu jinoyatni sodir qilgan shaxslar aniqlanib, ashyoviy dalil bo‘lgan qora mol o‘z egasiga qaytarildi. Afsuski, qoramol o‘g‘risi molini yo‘qotgan fuqaroning o‘g‘li va hamqishlog‘i bo‘lib chiqdi. Ular qoramolni o‘g‘irlab, qassob tanishiga arzon garovga pullab yuborgan”, — deydi viloyat IIB axborot xizmati rahbari Shuhrat Jalolov.
Ayni paytda gumonlanuvchilarga nisbatan dastlabki tergov harakatlari olib borilmoqda.
Izoh (0)