Tog‘li Qorabog‘dagi jangovar to‘qnashuvlarda 52 nafar suriyalik yollanma jangchi halok bo‘lgan, deb xabar beradi “RBK” The Washington Post’ga tayanib.

Tog‘li Qorabog‘.

Foto: Reuters

Ma’lum bo‘lishicha, oktabr boshida ularning jasadlari Suriya-Turkiya chegara postida qarindoshlariga topshirilgan. Marhumlar Suriyada Turkiya tomonidan qo‘llab-quvvatlanuvchi harbiy guruhlar tomonidan Ozarbayjon tomonda turib Armaniston bilan jang qilish uchun yollangan.

Ozarbayjon prezidenti Ilhom Aliyev esa France 24 telekanaliga bergan intervyusida Boku tomonidan Tog‘li Qorabog‘dagi nizolarda yollanma jangchilar qo‘llanilgani yuzasidan hech bir davlat dalil keltira olmaganini aytdi. Uning so‘zlariga ko‘ra, Ozarbayjon armiyasi o‘z maqsadlariga o‘zi erisha oladi.

“Fikrimcha, agar hech qanday dalil-isbot bo‘lmasa, bu mish-mishlar o‘tmishda qolishi kerak. Bizda yollanma jangchilar yo‘q. Bu — bizning rasmiy bayonotimiz”, — dedi Aliyev.

Avvalroq Fransiya prezidenti Emmanuel Makron Parij Tog‘li Qorabog‘dagi jangovar harakatlarda suriyalik jangarilar qatnashayotgani haqida aniq ma’lumotga ega ekanligini aytgan edi.

Suriya va Liviyadan yollanma jangchilarning Qorabog‘ga ko‘chirib o‘tkazilgani haqida ma’lumotlar borligini Rossiya TIV ham xabar qilgan edi. Bunda gap jangovar harakatlarda pul uchun qatnashishni rejalashtirayotgan minglab jangarilar haqida bormoqda.

Eslatib o‘tamiz, The Wall Street Journal gazetasi ham Suriyadagi manbalariga tayanib, Tog‘li Qorabog‘ga Turkiyaga aloqador yuzlab suriyalik jangarilar ko‘chirib o‘tkazilganini xabar qilgan edi.

Tog‘li Qorabog‘da keng qamrovli jangovar harakatlar 27-sentabrdan buyon davom etmoqda. Ozarbayjon va Armaniston 10-oktabr kuni soat 12:00 dan boshlab Tog‘li Qorabog‘da o‘t ochishni to‘xtatish to‘g‘risida kelishib olgandi. Ammo shu kuni keyinroq Armaniston va Ozarbayjon Mudofaa vazirliklari bir-birini Tog‘li Qorabog‘da o‘t ochishni to‘xtatish rejimini buzishda aybladi.