AQShda ikkita dori — remdesivir va Eli Lilly kompaniyasining antitanachali zardobini birgalikda qo‘llagan holda COVID-19’ni tajribali davolashda qatnashish uchun ko‘ngillilarni saralab olish jarayoni “ehtiyotkorlik yuzasidan” to‘xtatildi, deb xabar bermoqda “Interfaks”.

Foto: Reuters

Eli Lilly tadqiqotlarda tanaffus bo‘lib qolganini tasdiqladi, ammo buning sababini oshkor etmasdan, kompaniya uchun xavfsizlik birlamchi ekanligi haqidagi bayonot bilan cheklandi. Tadqiqotlarga homiylik qilayotgan AQSh Allergiya va yuqumli kasalliklar milliy instituti izoh berishdan bosh tortdi.

Associated Press qayd etishicha, sinovlarni davlat regulyatori emas, tadqiqotlar homiysi to‘xtatib qo‘ygan, shu sababli tanaffus uzoq davom etmasligi kerak.

ACTIV-3 deb ataluvchi tadqiqot avgustda boshlangan edi. Unda AQSh, Daniya va singapurlik yotib davolanayotgan 10 mingga yaqin bemor qatnashmoqda. Ishtirokchilarning barchasi AQShda qo‘llash uchun shoshilinch tarzda ruxsat berilgan remdesivirni hamda Amerikaning Eli Lilly kompaniyasi Kanadaning AbCellera kompaniyasi bilan hamkorlikda ishlab chiqarayotgan antitanachalardan iborat dorini yoki platseboni qabul qilmoqda.

Eli Lilly’ning dorisi — AQSh prezidenti Donald Trampni davolash uchun berilgan Regeneron dorisining muqobili bo‘lib, ikkalasi ham koronavirusga nisbatan neytrallashtiruvchi antitanachalarga asoslangan, ammo Eli Lilly’ning dorisida antitananing faqat bitta turi, Regeneron’da — ikkita turi mavjud.

Bir kun avval AQShda Johnson & Johnson farmatsevtik kompaniyasi COVID-19’ga qarshi vaksina sinovlarini to‘xtatgan, bunga tadqiqotlar ishtirokchisining “noma’lum” kasalligi sabab bo‘lgan edi.

Johnson & Johnson’dan tashqari, AQShda AstraZeneca, Moderna va Pfizer BioNTech bilan hamkorlikda o‘z vaksinalarini sinamoqda.

Eslatib o‘tamiz, ayni paytda koronavirusga qarshi faqat bitta vaksina — Rossiyadagi Gamaleya nomidagi markazning “Sputnik V” vaksinasi ro‘yxatdan o‘tgan. U avgust oyida klinik sinovlar tugashidan oldin ro‘yxatdan o‘tkazilgan.