Belarus politsiyasi xodimlari va harbiy xizmatchilari ko‘chalarni tark etishmaydi va, agar kerak bo‘lsa, maxsus vositalar va jangovar qurollardan foydalanishadi. Bu haqda “BelTA” axborot agentligi ichki ishlar vazirining birinchi o‘rinbosari — Belarus kriminal militsiyasi boshlig‘i Gennadiy Kazakevichning so‘zlariga tayanib, ma’lum qildi.

Foto: “Tut.by”

Vazirning birinchi o‘rinbosari so‘zlariga ko‘ra, IIV hududlardagi norozilik harakatlari pasayib borayotganini, ammo ular Minskka ko‘chib, yanada radikallashayotganini aytmoqda. “Minskda sodir bo‘lgan yakshanba kungi harakatlar bunga yorqin dalildir”, — deya ta’kidlaydi u.

“Hatto kunduzi va kechqurun ham u yerda toshlar, butilkalar uchayotgan edi, pichoqlar va charxlar bor edi. Kechga kelib esa barrikadalar va yonayotgan shinalar paydo bo‘ldi. Buning fuqarolik namoyishlarga aloqasi yo‘q. Biz nafaqat tajovuzga, balki jangarilar, radikallar, anarxistlar, futbol fanatlari to‘dalarining avgust boshidagi voqealarni takrorlashga bo‘lgan urinishlariga duch keldik”, — deydi Gennadiy Kazakevich.

Belarusda prezident saylovlari natijalaridan norozi bo‘lgan fuqarolar namoyishlari boshlanganiga ikki oydan oshdi. Yakshanba kuni bo‘lib o‘tgan namoyishlarda butun respublika bo‘ylab 700 dan ortiq kishi hibsga olingan. Namoyishchilarga qarshi tovushli granatalar va suv purkagichlar ishlatilgan. Ma’muriy huquqbuzarliklar to‘g‘risidagi ishlarni sudda ko‘rib chiqishdan oldin 570 kishi qamoqqa joylashtirildi.

Avvalroq Lukashenko hibsdagi muxolifat vakillari bilan uchrashuv o‘tkazgani to‘g‘risida xabar berilgandi.

Eslatib o‘tamiz, Belarusda 9-avgust kuni bo‘lib o‘tgan saylovlarni soxtalashtirish haqidagi ma’lumotlar fonida norozilik namoyishlari boshlandi va haligacha davom etmoqda. Namoyishchilar Lukashenkoni saylovni soxtalashtirishda ayblamoqda. Saylov natijalariga ko‘ra, Aleksandr Lukashenko 80 foiz ovoz to‘plagan.

Belarus Markaziy saylov komissiyasi ma’lumotlariga ko‘ra, Svetlana Tixanovskaya prezidentlik saylovida 10,1 foiz ovoz to‘plagan. Tixanovskayaning o‘zi esa mag‘lubiyatini tan olmadi va o‘zini “Belarus xalqi tomonidan saylangan yagona yetakchi” deb atadi. Saylovdan ikki kun o‘tgach Tixanovskaya Litvaga chiqib ketgan. Uning safdoshlari Tixanovskaya hukumat bosimi ostida mamlakatdan chiqib ketganini ma’lum qilgan.