Yengil vazn toifasida UFC chempioni Habib Nurmagomedovning menejeri Ali Abdulaziz amerikalik yakkakurashchi Toni Fergyusonga Islom Maxachev bilan jang qilishni taklif qildi.
Foto: Getty Images
Avvalroq Maxachevning UFC 254 musobaqasidagi raqibi Rafael dos Anyosda koronavirus aniqlangan va shu tufayli braziliyalik yakkakurashchi jangda ishtirok eta olmasligi ma’lum bo‘lgandi.
“Toni, nima deb o‘ylaysan? Habibga eng yaqin odam — Islom. Dos Anyos safdan chiqdi — uni o‘rnini egallashni istaysanmi? Rahmat”, — deya yozadi Abdulaziz o‘z Twitter’ida.
Islom Maxachev ayni damda UFC yengil divizioni reytingida 12-o‘rinni egallab turibdi. U so‘nggi jangini 2019-yilning sentabrida o‘tkazgan va unda Devi Ramosni mag‘lub etgandi. Islom MMA’da jami 19 ta jang o‘tkazib, ularning 18 tasida g‘alaba qozongan va bir marta mag‘lubiyatga uchragan. Sportchi UFC’dagi 8 jangining yettitasini g‘alaba bilan tugatgan.
Maxachev va Fergyuson ishtirokidagi barcha janglarni bu yerda ko‘rish mumkin — havola.
Toni Fergyuson MMA’da 29 jang o‘tkazib ularning 25 tasida g‘alaba qozongan va to‘rt bor mag‘lubiyatga uchragan. So‘nggi bor sportchi 2020-yilning may oyida Jastin Getjiga qarshi jang qilib, nokautga uchragan va yengil vazn vaqtinchalik chempionlik kamarini boy bergandi. Toni ayni damda UFC yengil divizioni reytingida 3-o‘rinni va umumiy reytingda 7-pog‘onani egallab turibdi.
