O‘zbekistonda koronavirusga qarshi kurashayotgan tibbiyot xodimlariga 20-avgustdan 20-sentabrgacha bo‘lgan muddat uchun ish haqlari to‘lab beriladi

2020-yil 24-sentabrda O‘zbekiston Respublikasi Vazirlar Mahkamasining “O‘zbekiston Respublikasida koronavirus infeksiyasi tarqalishining oldini olish tadbirlariga ajratilayotgan mablag‘larning samaradorligini ta’minlashga oid qo‘shimcha chora-tadbirlar to‘g‘risida” qarori e’lon qilindi. Bu haqda Sog‘liqni saqlash vazirligining axborot xizmati xabar berdi.

Mazkur qarorga ko‘ra, xodimlarga ish hajmidan kelib chiqib, kunbay ishlash sharoitida har 30 kunlik davr uchun ish yuklamasini inobatga olgan holda har oylik ish faoliyati yakuni bo‘yicha quyidagi miqdorlarda (soliqlardan tashqari) maxsus to‘lov belgilandi:

• vrach xodimlarga, vrach-laborantlarga – 25 million so‘m;
• boshqaruv va o‘rta tibbiyot xodimlariga, hamshira-laborantlarga – 15 million so‘m;
• provizor-farmatsevt xodimlarga – 10 million so‘m;
• dezinfektor va kichik tibbiyot xodimlariga – 8 million so‘m;
• boshqa xodimlarga – 5 million so‘m.

Statsionar tibbiyot muassasalari hamda laboratoriyalarga jalb qilingan xodimlarga maxsus to‘lovlar:

• xodim 2020-yilning 20-avgust kunigacha faoliyat yuritgan bo‘lsa, uning 14 kunlik faoliyati yakuni bo‘yicha hisob-kitob qilingan bo‘lishi kerak. Bunda 14 kunlik faoliyati yakuniga qadar amalda bo‘lgan shartlar saqlab qolinadi.
• xodim 2020-yilning 20-avgust kunidan keyin jalb qilingan bo‘lsa, 30 kunlik davr uchun har oy yakuni bo‘yicha hisob-kitob qilinadi.

Shuningdek, koronavirus infeksiyasi bilan kasallangan bemorlar joylashtirilgan statsionar davolash muassasalari rahbarlari va bevosita davolash ishlari bilan shug‘ullanuvchi uning o‘rinbosarlariga vrachlar uchun belgilangan maxsus to‘lov, ya’ni 25 million so‘m miqdoridagi to‘lov tatbiq etiladi.

2020-yil 6-avgustda Moliya vazirligi tomonidan respublika bo‘yicha koronavirusga qarshi kurash tadbirlari uchun 2020-yilning 4-avgustiga qadar jami 1 trillion 303 milliard so‘m mablag‘ xarajat qilingan bo‘lib, jumladan, koronavirusga qarshi kurash tadbirlariga jalb qilingan tibbiyot xodimlariga 3—4-avgust kunlari 15 milliard 763 million so‘m mablag‘ to‘lab berilganini bildirgan.