Koronavirus pandemiyasiga qarshi kurash me’yoriy hayotga qaytish bilan emas, balki yanada yaxshiroq hayot qurish bilan tugashi lozim, sababi yangi muqaddima tomon imkoniyat yaratilmoqda. Bu haqda Italiya bosh vaziri Juzeppe Konte ma’lum qilgan.

Juzeppe Konte

Foto: Sputnik

“Ko‘rinmas dushman hayotimizni buzdi va o‘rganib qolgan odatlarimizga ta’sir ko‘rsatdi. Pandemiya barcha hududlar va dunyo millatlariga ta’sir qildi, insoniyat uchun navbatdagi sinovga aylandi. Mazkur fojia bizni o‘zgartirdi, lekin u bir vaqtning o‘zida bizga yangi muqaddima uchun imkoniyat yaratmoqda”, – degan Konte BMT Bosh Assambleyasining 75-sessiyasida so‘zlagan nutqida.

“Pandemiya ustidan g‘alaba qozonish umidi avvalgi me’yoriy hayot tarziga qaytish imkonini berishi haqidagi xohish bilan hamohang bo‘lmasligi kerak. Biz ko‘prog‘ini istashimiz, o‘ylab topishimiz va qaytadan yangi dunyo yaratishimiz zarur: sababi avvalgi hayot tarzi eng yaxshisi emas edi va uni yanada takomillashtirish mumkin”, – degan Italiya hukumati rahbari.

Uning so‘zlariga ko‘ra, pandemiya har bir insonga yanada yaxshi bo‘lishi uchun o‘ziga xos chaqiruv, ushbu imkoniyatni rad etish kechirib bo‘lmas xatoga aylanishi mumkin.

Konte Italiyaning 2021-yildan boshlab G-20 “Katta yigirmalik”ga raislik qilishi bu ishlarni amalga oshirishda qo‘l kelishi haqida ham gapirgan. Konte mamlakatning asosiy vazifalari sifatida “shaxslar, sayyora, rivojlanish” formulasi bo‘yicha ishlashni taklif qilgan.

“Biz global va demokratik miqyosda odamlar teng huquqli bo‘lgan, inklyuziv jamiyat uchun adolatsizlik va ijtimoiy tengsizlikka qarshi kurashib, o‘zgarishlar uchun berilgan imkoniyatdan unumli foydalanmoqchimiz”, – degan Konte.

Italiya bosh vaziri mamlakatning koronavirus infeksiyasiga qarshi vaksina yaratilishidagi ulushi haqida ham gapirib, bu dunyo xalqlarining birlashuvida ulkan ahamiyat kasb etishini ta’kidlagan.

“Biz Yer sayyorasining va bolalarimizning kelajagiga xudbinlik bilan befarq qaramasligimiz, dunyoning ko‘plab joylarida sog‘liqni saqlash masalasiga e’tibor qilishimiz kerak”, – deya nutqiga yakun yasagan Italiya bosh vaziri.