O‘zbekistonda 8-sentabr soat 23:30 dan 9-sentabr soat 23:30 ga qadar koronavirus yuqtirib olish bilan bog‘liq 512 ta holat qayd etildi. 20-avgustdan so‘ng birinchi marta kunlik kasallanganlar soni 500 nafardan oshdi. Yangi holatlardan so‘ng O‘zbekistonda koronavirusga chalinganlar soni 44930 nafarga yetdi. Koronavirusga chalinish holatlarining 1,1 foizi 9-sentabrga to‘g‘ri keldi. Bundan tashqari, O‘zbekiston koronavirusga chalinganlar soni bo‘yicha Qirg‘izistondan o‘tib ketib, dunyoda 60-o‘ringa chiqib oldi.
Yangi kasallanish holatlari
Yangi kasallangan 512 kishining barchasi tana harorati ko‘tarilgani bois profilaktika maqsadida hamda koronavirusga chalingan bemorlar bilan muloqotda bo‘lganligi sababli namuna olingan fuqarolar orasidan aniqlangan:- Toshkent shahrida — 331 nafar;
- Toshkent viloyatida — 105 nafar;
- Qashqadaryo viloyatida — 30 nafar;
- Samarqand viloyatida — 12 nafar;
- Andijon viloyatida — 11 nafar;
- Namangan viloyatida — 9 nafar;
- Farg‘ona viloyatida — 6 nafar;
- Xorazm viloyatida — 6 nafar;
- Navoiy viloyatida — 2 nafar.
Toshkent shahrida 331 kishida koronavirus aniqlandi. Bu poytaxtda sentabr oyida eng ko‘p kasallik aniqlangan kun bo‘ldi. Umuman olganda, poytaxtda 3-sentabrdan beri kunlik kasallanish holatlari ko‘payib bormoqda: 3-sentabrda 109 kishida, 4-sentabrda 135 kishida, 5-sentabrda 170 kishida, 6-sentabrda 177 kishida, 7-sentabrda 190 kishida va 8-sentabrda 317 kishida COVID-19 qayd etilgandi. Sentabrning 9 kunida Toshkentda kasallanganlar soni 1831 nafarga ko‘paydi. SSV jadvalidagi 14 ta hududdan 12 tasida epidemiya mavsumida hali buncha bemor aniqlanmagan. Hozirda Toshkentda koronavirusga chalinganlarning umumiy soni 27383 nafarga yetdi. O‘zbekiston bo‘yicha COVID-19 tashxisi qo‘yilganlarning 60,9 foizi poytaxt hisobiga to‘g‘ri kelmoqda.
Toshkent viloyatida 105 kishida COVID-19 aniqlandi. Viloyatda 4-sentabrdan so‘ng endi kunlik kasallanishlar soni 100 nafardan oshmoqda. Sentabrda Toshkent viloyatida koronavirusga chalinganlar soni 877 nafarga ko‘payib, umumiy kasallanganlar soni 8082 nafarga yetdi. Bu O‘zbekiston bo‘yicha koronavirusga chalinganlarning 18 foiziga tengdir.
Qashqadaryo viloyatida 30 kishida kasallik qayd etildi. 6-avgustdan beri birinchi marta Qashqadaryoda kunlik kasallanganlar soni 30 nafarga chiqdi. Viloyatda koronavirusga chalinganlarning umumiy soni 1013 nafarga yetdi. Qashqadaryo koronavirusga chalinganlar soni 1000 nafardan oshgan Toshkent shahri, Toshkent, Samarqand, Andijon va Buxoro viloyatlaridan so‘ng oltinchi hudud bo‘ldi.
Samarqand viloyatida 12 kishida koronavirus aniqlandi. Sentabr oyida viloyatda faqat 2 va 8-sentabr kunlari yangi holatlar ro‘yxatga olinmadi. Oy davomida kasallanganlar soni 72 nafarga ko‘paydi. Samarqandda COVID-19 qayd etilganlar soni 1790 nafarga yetdi. O‘zbekiston bo‘yicha koronavirusga chalinganlarning 4 foizi Samarqand viloyatiga to‘g‘ri kelmoqda.
Andijon viloyatida 11 kishida COVID-19 qayd etildi. Viloyatda 7 kundan buyon uzluksiz ravishda kasallanish holatlari qayd etilmoqda. Andijonda koronavirusga chalinganlarning umumiy soni 1264 nafarga yetdi. O‘zbekiston bo‘yicha COVID-19 tashxisi qo‘yilganlarning 2,8 foizi Andijon viloyati hisobiga to‘g‘ri kelmoqda.
Namangan viloyatida 9 kishida koronavirus qayd etildi. Sentabr oyining 6 kunida Namanganda yangi kasallanish holatlari aniqlandi. Bu kunlarda Namangan viloyatida koronavirusga chalinganlar soni 40 kishiga ko‘paydi. Viloyatda kasallanganlar soni 949 nafarga yetdi.
Farg‘ona viloyatida 6 kishida COVID-19 aniqlandi. Sentabr oyida viloyatda faqat 6 va 8-sentabr kunlari yangi holatlar ro‘yxatga olinmadi. Oy davomida Farg‘onada kasallanganlar soni 26 kishiga ko‘paydi. Farg‘onadagi jami kasallanganlar soni 349 nafarni tashkil etmoqda. Kuni kecha viloyat hokimi Shuhrat G‘aniyevning akasi, Marg‘ilon shahar tibbiyot birlashmasi boshlig‘i Avazbek G‘aniyev koronavirusga chalingani va og‘ir ahvolda ekanligi haqida xabar tarqalgandi. Farg‘ona viloyati hokimligi axborot xizmati bu xabarlarni rad etdi hamda Avazbek G‘aniyev pnevmoniya xastaligi va yuqumsiz bo‘lgan boshqa hamroh kasalliklar bilan ayni kunda Marg‘ilon shahar tibbiyot birlashmasi shifoxonasida davolanayotganini ma’lum qildi.
Xorazm viloyatida 6 kishida koronavirus qayd etildi. Sentabrning 9 kunidan 4 tasida viloyatda yangi kasallanganlar ro‘yxatga olindi. Kasallikka chalinganlarning umumiy soni hozirda 490 nafarga yetdi. O‘zbekiston bo‘yicha koronavirusga chalinganlarning 1,09 foizi Xorazm viloyati hissasiga to‘g‘ri kelmoqda.
Navoiy viloyatida 2 kishida koronavirus aniqlandi. Viloyatda sentabrda uchinchi marta yangi holatlar ro‘yxatga olinmoqda. Navoiyda koronavirusga chalinganlar soni 514 nafarga yetdi. Bu O‘zbekiston bo‘yicha COVID-19 tashxisi qo‘yilganlarning 1,14 foiziga teng deganidir.
O‘lim holatlari va ahvoli og‘ir bemorlar
SSV Toshkent shahrida 4 nafar, Toshkent viloyatida 2 nafar, jami 6 nafar koronavirusga chalingan bemor vafot etganini xabar qildi. Shuningdek, Bosh prokuratura boshqarma boshlig‘i ham koronavirus asoratlaridan vafot etgani ma’lum bo‘ldi.Birinchi o‘lim. Toshkent shahri Mirzo Ulug‘bek tumanida yashagan 83 yoshli M.M. ismli ayol vafot etgan.
Ikkinchi o‘lim. Toshkent viloyati Yangiyo‘l tumanida yashagan 56 yoshli E.D. ismli erkak vafot etgan.
Uchinchi o‘lim. Bosh prokuratura boshqarma boshlig‘i Hamza Fayziyev 61 yoshida koronavirus asoratlari oqibatida vafot etdi. Bu haqda marhumning hamkasblariga tayanib, “Xabar.uz” xabar berdi.
Uning o‘limi bo‘yicha SSV hozirgacha axborot bermagan.
To‘rtinchi o‘lim. Toshkent shahri Yunusobod tumanida yashagan 56 yoshli E.A. ismli erkak vafot etgan.
Beshinchi o‘lim. Toshkent shahri Shayxontohur tumanida yashagan 59 yoshli Z.A. ismli erkak vafot etgan.
Oltinchi o‘lim. Toshkent shahri Olmazor tumanida yashagan 59 yoshli U.T. ismli erkak vafot etgan.
Yettinchi o‘lim. Toshkent viloyati Chirchiq shahrida yashagan 55 yoshli G‘.D. ismli erkak vafot etgan.
Hozirgacha Sog‘liqni saqlash vazirligi 366 kishining koronavirus asoratlaridan vafot etganini xabar berdi. “Daryo” hisobi bo‘yicha koronavirusga chalingach, vafot etganlar soni 380 nafarni tashkil etmoqda.
SSV tomonidan koronavirus qurboni bo‘lgani “tan olinmaganlar”:
- 9 va 15-iyul kunlari Olmaliq shahar shifoxonalarida vafot etgan ikki ayol;
- DXA Navoiy viloyati boshqarmasi xodimi Adhamjon Dehqonov;
- Madaniyat vazirligi xodimi Akmal Irisov;
- Chilonzor tumani SEOM bakteriologiya laboratoriyasi mudiri Marhabo Ahmedova;
- Bosh prokurorning sobiq o‘rinbosari, Qoraqalpog‘iston prokuraturasida bo‘lim boshlig‘i Hakimbay Xalimov;
- Jinoyat ishlari bo‘yicha Toshkent viloyat sudi sudyasi Xayriddin Shermuhamedov;
- Samarqand viloyati Toyloq tumani prokurori Farhod Abduxoliqov;
- Innovatsion sog‘liqni saqlash milliy palatasi “Buyuk kelajak” kengashi eksperti Sanjar Jalolov;
- Berdaq nomidagi Qoraqalpoq davlat akademik musiqali teatri artisti Janabay Utepbergenov;
- O‘zbekistonda xizmat ko‘rsatgan san’at arbobi, “O‘zbekkino” milliy agentligi Badiiy kengashi a’zosi Anvar Ergashev;
- “O‘zmetkombinat” aksiyadorlik jamiyati boshqaruvi raisi Sergey Vyunenko;
- Qashqadaryo viloyatining Mirishkor tumani hokimi G‘ayrat Begaliyev;
- Bosh prokuratura boshqarma boshlig‘i Hamza Fayziyev.
Ayni paytda tibbiyot muassasalarida davolanayotgan 2352 nafar bemordan 427 nafari og‘ir, 224 nafari esa o‘ta og‘ir ahvolda. Bir kun oldin ahvoli og‘ir va o‘ta og‘ir bemorlarning umumiy soni 654 nafardan 628 nafarga tushgandi, endi esa 651 nafarga ko‘tarildi. Hozirda davolanishni davom ettirayotganlarning 27,7 foizining ahvoli og‘ir bo‘lib turibdi.
Kasallikdan davolanish
9-sentabr kuni O‘zbekistonning 7 ta hududida 314 nafar bemor koronavirusdan sog‘aydi. Sentabrda to‘rtinchi marta kunlik sog‘ayish ko‘rsatkichi yangi kasallanish holatlaridan past bo‘ldi.Yangi tuzalganlarning
- 188 nafari Toshkent shahrida;
- 98 nafari Toshkent viloyatida;
- 9 nafari Samarqand viloyatida;
- 8 nafari Namangan viloyatida;
- 5 nafari Farg‘ona viloyatida;
- 4 nafari Xorazm viloyatida;
- 2 nafari Andijon viloyatida kasallikdan forig‘ bo‘ldi.
Ma’lumot uchun, O‘zbekistonda koronavirus epidemiyasi sabab sog‘liqni saqlash tizimiga tushayotgan yuklamani bir qadar yengillatish maqsadida 5-iyuldan boshlab koronavirus infeksiyasi alomatsiz kechayotgan bemorlarga uy sharoitida davolanishga ruxsat berilgan, ushbu yo‘nalishda yo‘riqnoma va eslatmalar ham e’lon qilingan.
Biroq Sog‘liqni saqlash vazirligi koronavirusga chalinganlarga doir axborotlarida yangi bemorlarning qanchasida kasallik alomatsiz (simptomsiz) kechayotganiga aniqlik kiritmayapti, shu boisdan ayni vaqtda koronavirusdan davolanayotgan bemorlarning qanchasi kasalxonalarda qolayotgani, qanchasi uy sharoitida davolanayotgani ma’lum emas.
Hozirda kasallik qayd etilgan jami 44 930 nafar bemordan 42 212 nafari sog‘ayib, davolanish ko‘rsatkichi 94 foizni tashkil etmoqda. To‘rt kundan buyon davolanish ko‘rsatkichi 94 foiz bo‘lib turibdi. Bu eng yuqori natija hisoblanadi.
Sog‘liqni saqlash vazirligi ma’lumotlari bo‘yicha ayni paytda 2352 nafar bemor COVID-19’dan davolanmoqda. Ikki kun avval davolanishni davom ettirayotgan bemorlar soni 2027 nafarni tashkil etayotgandi. Endi esa sentabrdagi eng salbiy ko‘rsatkichga chiqdi.
Hozirda eng ko‘p bemor Toshkent shahrida davolanmoqda — 1674 nafar. Farg‘onada 6, Xorazmda 9, Navoiyda 10, Jizzaxda 10, Qoraqalpog‘istonda 12, Surxondaryoda 19, Sirdaryoda 31, Buxoroda 33, Namanganda 37, Andijonda 52, Qashqadaryoda 60, Samarqandda 122 va Toshkent viloyatida 277 nafar bemor qoldi.
Izoh (0)