2020-yilning 3-avgust kuni AOKAda Koronavirusga qarshi kurash shtabi a’zolari va Sog‘liqni saqlash vazirligi rahbariyati ishtirokida matbuot anjumani tashkil etildi. Unda OAV vakillarining COVID-19 va karantinga oid o‘nlab savollariga javob qaytarildi.

“Daryo” muxbirining xabar berishicha, tadbirda shtab a’zosi Habibullo Oqilov koronavirus tufayli vafot etayotgan bemorlarning barchasi ham nima sababdan statistikaga kiritilmayotganini izohladi.

Foto: “Daryo”

“Haqiqatan ham statistikada berilgan vafot etganlar soni bilan real hayotdagi o‘limlar soni orasida tafovut bor.

Masalan, bemor kelganda qo‘lida test tahlili yo‘q bo‘ladi. Uni qilishga ulgurmagan ham, harakat ham qilmagan. Oldin bunday bemorlarni COVID-19 statsionarlariga qabul qilmas edik. Oddiy statsionarda davolardik. Hozir agar klinik tashxis qo‘yilsa, tahlil natijasini kutmasdan ham koronavirus alomati mavjud bemorni statsionar yoki uy sharoitida davolashni boshlashga buyrug‘imiz bor.

Biroq, ming afsuski, uyida davolanishga harakat qilib, test tahlilisiz og‘ir ahvolda olib kelingan bemorlar bir necha kun yotib vafot etadigan bo‘lsa, o‘sha vaqt ichida ulardan klinikada tahlil olinib, tasdiqlanmagan bo‘lsa, ular statistikaga koronavirus qurboni bo‘lib tushmaydi. Shuning uchun ham statistikada tafovut bo‘lishi mumkin. Ular pnevmoniyadan o‘lgan deb hisoblanadi. Tahlili borlar esa statistikaga kiritiladi”, — dedi Oqilov.