Moskvada iyul oyida koronavirus bilan kasallanish bo‘yicha sutkalik rekord qayd etildi

Moskvada o‘tgan bir sutka ichida 695 kishida koronavirus aniqlandi. Bu haqda Rossiya poytaxti tezkor shtabiga tayanib, “RBK” xabar berdi.

Mazkur sutkalik ko‘rsatkich iyul oyidagi maksimumga aylandi. Moskvada bundan oldingi sutkalik rekord 30-iyunda qayd etilgan bo‘lib, o‘shanda 745 kishida koronavirus aniqlangan edi.

Ma’lumotlarga ko‘ra, Moskvada koronavirus bilan kasallanganlarning umumiy soni 241 359 kishiga yetgan. Hozirga qadar bemorlarning 179 168 nafari sog‘aygan, 4460 kishi esa COVID-19 qurboniga aylangan.

Butun Rossiya bo‘ylab esa pandemiya boshlanganidan buyon koronavirusga chalinganlar soni 839 981 kishini tashkil etmoqda. O‘tgan bir sutka ichida butun mamlakatda yana 5482 kishida COVID-19 tasdiqlangan.

Avvalroq Moskva meri Sergey Sobyanin shahar aholisining 60 foizida koronavirusga qarshi jamoaviy immunitet shakllanganini ma’lum qilgandi.