Bezgakka qarshi dori vositasi — “Gidroksixloroxin”ning koronavirusni davolashdagi foydaliligi yirik tadqiqotlar bilan tasdiqlanmagan. Bu haqda JSST vakili Maykl Rayanga tayanib, “Izvestiya” xabar berdi.
Foto: “Inosmi.ru”
Rayanning ta’kidlashicha, kichik tadqiqotlarda “Gidroksixloroxin”ni qo‘llashda muayyan ijobiy samara kuzatilgan bo‘lsa-da, biroq barcha yirik tadqiqotlar ushbu dori vositasi qo‘llanishidan ijobiy natija ko‘rsatmagan.
JSST vakilining so‘zlariga ko‘ra, “Gidroksixloroxin” “koronavirusga chalingan bemorlar holatini yaxshilamagani” haqida ilmiy tasdig‘ini topgan ko‘plab tibbiy isbotlar bor.
Ushbu vositaning koronavirusga qarshi samarasiz ekanini AQShning bosh infeksionisti Entoni Fauchi ham tasdiqlagan. Shuningdek, AQShning sog‘liqni saqlash va ijtimoiy xizmatlar vazirligi “Gidroksixloroxin”ning koronavirusni davolashdagi xavfidan ogohlantirgan.
“Gidroksixloroxin” bezgakka qarshi dori vositasi bo‘lib, undan ba’zi davlatlarda koronavirusni davolashda foydalanilgan. Iyun oyida JSST ushbu vositani koronavirusni davolashda dori sifatida qo‘llashni to‘xtatishga qaror qilgandi.
Avvalroq O‘zbekistonda “Plakvenil”ni (“Gidroksixloroxin”) davolash protokollardan chiqarib tashlash haqida gapirgan “Tez yordam” ko‘rsatuvi ekspertiga tahdid qilingani to‘g‘risida xabar berilgandi. Toshkent vrachlar malakasini oshirish instituti rektori, Koronavirusga qarshi kurashish shtabi a’zosi, professor Habibullo Oqilov “Plakvenil” dori vositasining hamon qo‘llanilayotganiga izoh berib, 12 mingga yaqin koronavirusga chalingan bemorlar ayni shu dori vositasi yordamida tuzatilganini ta’kidlagan.
