Jons Hopkins universiteti ma’lumotlariga ko‘ra, AQShda koronavirus bilan kasallanish natijasida 150 mingdan ortiq odam vafot etgan, deya xabar berdi “RBK”.
Mamlakatda ushbu kasallikka chalinganlarning umumiy soni 4,4 millionga yetdi. Kasalliklarni nazorat qilish va profilaktika markazlarining so‘nggi ma’lumotlariga ko‘ra, oxirgi sutkada mamlakatda 59,8 mingta yangi holat va mingdan ortiq o‘lim qayd etilgan.
The New York Times gazetasi ma’lumotlariga ko‘ra, iyun oyining oxiridan boshlab AQShda koronavirusning yangi to‘lqini kuzatilgan. Kasallikka chalinganlarning sutkalik rekord 16-iyul kuni qayd etilgan. Bu kunda AQShda 75,6 ming kishida koronavirus aniqlangan.
AQSh prezidenti Donald Tramp 22-iyul kuni AQSh pandemiya bilan kurashishidan oldin koronavirus bilan bog‘liq vaziyat yomonlashishi mumkinligini aytgan edi. U fuqarolarni himoya niqoblarini kiyishga chaqirgan.
Uning o‘zi birinchi marta 12-iyul kuni jamoatchilik qarshisida tibbiy niqobda ko‘rinish berdi. Bungacha prezident niqob kiyishga sabab ko‘rmaganligini va bu uning maqomiga mos kelmasligini aytgan edi.
Izoh (0)